可能大家呢排都好關注有關《逃犯條例》修訂嘅反政府行動，所以對其他社會新聞都唔係太關心，包括曾經備受關注違法佔領九犯案；廣男留意到，近日佔領九犯其中二人即係立法會社福界議員邵家臻同社民連黃浩銘出獄，其中有報道話剛出獄嘅邵家臻表明「信念更堅定」，又稱要繼續在立法會抗爭，「栽種」有心參政嘅人士及社工。廣男睇到呢啲新聞，腦海立即浮現多條問題，一個犯完法、坐完監仲要話自己「信念更堅定」（應為抗爭信念）嘅人，仲可以係立法會議員？仲可以係社工或者大學講師？

浸大如何處理邵家臻？

對於邵家臻，廣男第一個諗到嘅問題，係佢作為浸大社工系嘅講師，浸大、浸大校長錢大康，到底會點處理邵家臻？廣男睇唔到近期有咩新聞講過邵家臻喺浸大去留嘅問題，但睇返浸大嘅網頁，入面社會工作系教職員嘅名單中，依然仲有邵家臻個名；浸大係要保留佢教席，繼續聘用佢，解僱佢或者等佢完成合約後自動「分手」，係咪都應該有個說法呢？如果保留佢教席、繼續聘用佢，即係俾講明要繼續抗爭嘅釋囚政客喺大學散播政治思想？呢個問題浸大、錢大康一定要面對、處理同交代，冇得避！

除咗浸大如何處理邵家臻去留嘅問題，廣男覺得大家同樣可以留意下，邵家臻其實係一個註冊社工，呢個又係另一個問題；計正犯咗刑事罪行嘅人，無論佢嘅身份係普通社工抑或政界人士，社工註冊局都應該要展開聆訊，決定係咪繼續俾呢個人繼續做社工。依家完全無聲氣，社工註冊局係想採取拖字訣，定係好似之前對待襲警罪成嘅曾健超咁，寬待邵家臻？同浸大嘅教席一樣，社工界係咪仲要俾犯法甚至可能叫人犯法嘅社工「留低」呢？

立法會不會處理邵家臻？

最後，就係有關邵家臻嘅立法會議席問題，邵家臻判監超過一個月，理論上經立法會出席會議嘅三分之二議員通過解除其職務，立法會主席就可以宣告邵家臻喪失議員資格；喺依家呢個形勢下，立法會會唔會就其職務進行辯論，再投票表決？相信唔會，因為盲反派議員一定會包庇邵家臻！換句話說，邵家臻可能可以繼續做立法會議員、社工甚至浸大講師，咁犯法、坐完監都「待遇」照舊，社會其他人、年輕人睇完會否咩感覺呢？廣男覺得大家可以思考下呢個問題。 

原圖：RTHK

請Follow我們的YouTube頻道：