政府動用《緊急法》為《禁蒙面法》立法，為止暴制亂踏出重一步；訂立有關法例係為阻止暴徒蒙面然後作惡，其實大家都明白，暴徒唔願意遵從，大家都「理解」，奇就奇在有中學校長，竟然表明唔會向教育局上報戴口罩學生嘅人數，話唔擔心有後續問題。政府有法例、有指引，表明學生唔應該戴口罩返學，而有學校校長表明唔配合，呢個係咩心態？係咪暴亂無休無止，學校都覺得唔需要配合政府，繼續由得班學生「想做咩就做咩」呢？

應向學生了解事情

廣男就覺得，如果有學生決定戴口罩返學，唔係話呢啲學生就係「有罪」或者就等同於「暴徒」；相關學生如果唔係病而戴口罩，最合理嘅解釋就係要作出政治宣示，校方係咪應該了解下咩事，知道學生戴口罩嘅原因，然後將情況上報俾教育局，等局方了解指引發出後嘅情況呢？

社會有社會嘅法律，學校亦自己學校嘅規矩，如果政府已經立法，而教育局亦已經發出指引，學校就有責任跟從，學生亦要遵守有關規定。大家可以想像下，如果有一群學生喺校外聚集、戴口罩，繼而作出政治宣示，呢班學生有冇干犯《禁蒙面法》？如果學生有機會墮入法網，而校方選擇默不作聲，咁校方嘅縱容，就係害咗班學生！更進一步地講，一班學生如果返學可以蒙面，佢哋喺課外時間又會唔會戴口罩甚至Full Gear上街呢？防止學生上街抗爭甚至違法，第一步好明顯就係要先了解學生情況，喺有事之前介入，防患未然，否則學生「出事」先補鑊，又有咩用呢？

仁慈與縱容 一線之間

另一值得留意嘅地方，就係有同學喺學校作出政治宣示、戴口罩，繼而「影響」、威逼其他同學模仿佢哋，甚至要求一齊上街，又點算呢？當中學生等都唔願意遵守《禁蒙面法》，其他人例如大學生以至成年人，就更加唔想遵守！所以，廣男覺得學校作為守護學生嘅重要防線，應該提醒學生要遵守規定，否則觸犯法例，後果十分嚴重。

睇返近幾日新聞，有好多非常年幼嘅少年被捕，最年輕嘅據報只係得12歲（廣男睇新聞見到啲貌似得10歲、11歲嘅少年被捕），點解佢哋會跟一班黑衣人上街？點解家長、成年人會俾佢哋上街？家長、教師、校長等等，明知班少年甚至兒童上街極度危險，佢哋有冇盡責阻止呢啲事發生？講真，一啲極度年幼嘅少年、兒童，佢哋係咪有足夠嘅判斷力去判斷政治議題，廣男覺得大家都心中有數，作為成年人，尤甚係家長、教師，應該係循循善誘佢哋，而唔係一味包庇、縱容。

真心愛護下一代，就要阻止佢哋以身試法，而社會亦應該深思，發生咁多事，我哋只係怪責執法嘅警方，定係走上街頭嘅黑衣暴徒？保護自己嘅子女、子侄、後輩，第一步就應該向暴力說不，第二步就係唔好俾佢哋跟黑衣暴徒上街，絕不能以身試法。有啲人可能以為自己只係對學生們仁慈，但大家要清楚、明白，仁慈與縱容，只係一線之間，今日嘅仁慈，如果變成縱容，咁就唔係幫啲學生、年輕人，而係害咗佢哋！ 

原圖：Takungpao