自《逃犯條例》修訂有爭議開始，社會上「風眼」處處，那怕你係商人、教師、校長甚至普通市民，都有機會捲入紛爭；而喺大學校園，繼之前浸大校長錢大康被學生「狙擊」後，中大校長段崇智亦成為學生攻訐對象，噚日甚至有學生辱罵佢，向佢撒溪錢，搞到佢一度拍枱，以表不滿。廣男覺得，政治入侵校園，故然係一大問題，同樣嚴重嘅問題，在於部分學生唔再守法，亦唔覺得需要尊重師長。

刑事毁壞 侮辱師長

噚日下晝，一批中大學生喺校內集會，「聲援」被捕同學，之後強闖大學行政樓要求同校長段崇智對話，期間有人打碎大樓玻璃門、塗污牆璧同噴上辱罵段崇智嘅字句；段崇智現身，當然又係受到學生粗暴徒對待同辱罵啦。尤其甚者，竟然有學生跳上會議枱上大叫，又向段崇智撒溪錢，極盡侮辱同歹毒。睇到相關新聞，廣男真係要問一句，呢啲係對話、溝通？班學生根本就係要搵校長嚟侮辱、「出氣」、洩忿！

有中大學生支持涉嫌違法嘅同學，校長段崇智反對所有暴力，雙方立場唔同，但咁係咪代表學生可以為所欲為呢？廣男必須指出，打碎玻璃門、塗污等行為，係犯法，係刑事毁壞；而侮辱師長，向校長撒溪錢，除咗極盡侮辱之外，詛咒校長嘅意味亦都好重。如果因為政見唔同就可以犯法，或者因為政見唔同就可以隨意辱罵他人，廣男真係不敢苟同。

過份縱容溺愛 令學生錯落去

老實講，作為大學生，應該有獨立判斷能力，如果佢哋要反對一啲政策、法例，呢啲係個人自由，但如果因為要反對某啲事，就可以肆意不禮貌對待他人甚至犯法，咁肯定有問題！高舉住「正義」旗幟，唔代表學生可以因此而肆意妄為，呢一點廣男覺得大家都要清楚！ 

至於大學以至中學嘅校長、教師，以至同學嘅家長、長輩等等，其實依家大家都睇到歪風蔓延，如果教師、家長們仲係唔面對學生嘅所作所為，選擇沉默，咁就等同於縱容、包庇同慫恿班學生繼續錯落去。大家必須明白，過分溺愛班學生，其實係等於害佢哋，今日班學生可以咁對待浸大、中大嘅校長或者老師，他日意見不同，佢哋一樣可以咁對待你哋，就算你哋係長輩甚至家長，一樣無面畀！ 

原圖：RTHK影片截圖

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app