政府動用《緊急法》並為《禁蒙面法》立法，過埋今晚12點就生效；其實《禁蒙面法》嘅用處大家都知，偏偏有啲反政府人士、盲反派政客係都要話有關法例唔掂。好似公民黨立法會議員郭榮鏗咁，今朝喺電台仲話《禁蒙面法》唔會令示威者「卻步」，更會將民情拉緊，甚至稱立法係香港邁向極權社會第一步，講到白色恐怖咁款。其實，依家暴徒周圍放火、打人，散播住黑色恐怖，郭榮鏗有暴力不譴責，反而去攻訐執法、維持治安嘅政府，呢啲係咩道理呢？

難以執行 就不執行？

作為一個法律界人士、立法會嘅法律界議員，講得出立法唔會令示威者「卻步」呢啲說話，囍雨覺得極度奇怪；講真，好多法例諸如違例泊車、過馬路及設立禁煙區等等，其實都好難執行，都好難罰晒所有違法者，但呢個唔係唔立法嘅理由嘛，之所以要立法，第一係先阻嚇，繼而再執法，執法困難，唔係唔立法嘅理由，郭榮鏗為咗幫暴徒強辯，真係咩理由都講得出口！

另一個問題，就係郭榮鏗話動用《緊急法》，政府喺N年前答應過會先經立法會審議，郭榮鏗呢個說法，囍雨直頭覺得係關乎常識，依家議會外連連衝擊，甚至經常發生暴力襲擊事件，暴力更不斷升級，議會內亦有拉布、衝擊會議廳嘅問題，郭榮鏗認為喺佢啲「同路人」嘅抗爭下，立法會仲可以審議到唔同嘅法案、議案咩？無論係郭榮鏗以至其他盲反派議員，基本上都有一個特性，就係一方面拒絕譴責暴徒、唔同暴力割席，但一方面又唔俾政府做嘢止暴制亂；囍雨想問，暴徒會唔會自覺有錯，繼而放棄暴力呢？又或者，暴徒會唔會聽公民黨勸唔好用暴力？答案係唔會囉！

放棄法治 等同放棄香港

依家就《禁蒙面法》立法，有人質疑係有損法治，有損香港形象，但囍雨想講，動用《緊急法》為《禁蒙面法》立法，係法治一部分，因為呢個係法例賦予特首同行政會議嘅權力；退一步講，如果有人覺得咁樣有問題，咁點解暴徒犯法，啲人仲要求「五大訴求」，包括唔好檢控呢啲暴徒呢？呢個政府唔可以止暴制亂，但暴徒犯法就要赦免嘅「道理」，囍雨真係唔明白；唔知郭榮鏗講「五大訴求」嘅時候，清唔清楚自己係一個大律師、一個法律界代表呢？如果法治係有啲人可以唔守法，大家要問下郭大律師，呢啲仲係咪法治呀？ 

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app