日前嘅「學生中槍」事件一如所料又成為咗盲反派喉舌《生果報》營造悲情、攻擊警方「濫暴」嘅好題材，但講到顛倒是非、謬論當真理嘅「本事」，廣男相信絕對無出《生果報》其右。就好似今日果篇「蘋論」，直頭倒果為因講到「警暴」先至係香港社會依家嘅最大問題咁、如果唔「煞停警暴」香港就「難有寧日」云云。廣男必須講句：錯！從來都係先有暴徒暴力，才有警方止暴；違法暴力一日唔停止，警方執法就唔會停。如果香港變成「黑暴治港」，先至真正永無寧日!

暴徒不以傷人為目標？

原本廣男實在懶理《生果報》篇歪論，因為成篇文章不外乎又係指摘警方依家無論「武器裝備」定係「動武心態」都升級緊，所以要「煞停警暴」之類，但係當廣男睇到文中有一句話「抗爭者」幾個月嚟「不以傷害他人包括警察為目標，基本上只在受襲、被追捕需要自衞時才有傷人的情況」時，廣男真係必須講句：《生果報》簡直擘大眼、講大話！請問，班暴徒以汽油彈、致命武器襲警，都叫「不以警察為目標」？堵塞港鐵出入口大肆縱火、將汽油彈掟入地鐵大堂，有冇顧及過市民安全？對唔同政見嘅市民禁錮、圍毆、暴力滅聲，又有冇「傷害過他人」？廣男實在憤怒，點解《生果報》可以無恥到連咁嘅嘢都講得出口？

暴力唔會自動停

事實上經過呢幾個月，相信廣大市民都已經睇清一個事實，就係暴力唔會自動停。就好似噚晚咁，一班暴徒又藉著「開槍事件」呢個新主題、喺全港多區瘋狂破壞。廣男又問下大家，面對咁嘅情況，係咪唔需要警察執法呢？係咪警察「唔出嚟」，班暴徒就會自動收手，將打爛、堵塞嘅一切都恢復原貌呢？其實噚晚就好似香港呢幾個月連場暴力破壞嘅一個「縮影」，大家都唔知道何時何地又會「出事」。廣男覺得警方有句話講得好啱：喺邊度放催淚彈，警方從來都冇得揀，係暴徒揀咗！所以依家越來越多網友都明白到一點：沒有暴力、何需警力？

多得盲反派扭曲事實推波助瀾

大家唔好忘記，當一班暴徒不斷喺街頭破壞之時，仲有一班盲反派政客、媒體喺幕後推波助瀾同包庇縱容。同樣就以「學生中槍」為例，擺在眼前嘅事實就係一班暴徒專登「獵警」、圍毆襲警，但一班政客唔單止掩蓋咗開槍嘅「前因」，仲要不斷以各種罔顧事實嘅文宣去美化暴徒、鼓吹「抗爭」。大家又諗下，當街頭有一班暴徒、幕後有一班政客，香港又會唔會有「安寧之日」呢？

廣男就話，若然暴力一日唔收手，香港就需要有警隊嚴正執法，但現時單靠警隊嘅力量已經並唔足夠，仲需要全社會齊反暴力、喝止違法，甚至必要時動用立法手段，祭出《緊急法》、《禁蒙面法》等一切有效方法。講真，無論咩「法」，都唔係大家想見到，但時至今日，面對唔會自動收手嘅暴徒，呢啲已經係冇辦法之中嘅辦法，目的只有一個，就係止暴制亂、令香港回復真正嘅安寧！

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app