「學生中槍」事件繼續全城發酵，囍雨睇報道話噚日就有幾百人去到中槍學生所屬嘅中學門外集會，一邊「聲援」傷者、一邊要求學校「譴責警方」等等。但囍雨唔明白，喺呢啲「聲援、訴求」背後，點解又冇人深究下警察開槍之前，果位學生又做緊咩呢？冇錯，「學生中槍」係事實，但佢full gear去「抗爭」、涉嫌參與暴動、暴力襲警同樣係事實，大家要注意，當時呢位學生嘅身份係暴徒。囍雨認為，大家睇事情唔可以只睇「結果」而漠視造成呢個「結果」嘅「前因」。依家學生涉嫌違法，仲要逼學校去「譴責警方」又係咩道理？

囍雨睇報道，噚日參與集會嘅學生、校友、市民都將矛頭對準警方，有啲人就手持標語並大叫口號「譴責警方合法謀殺」、「使用過份暴力」等等，有啲就批評校方「係咪講句支持學生、譴責警方嘅都咁難？」，而對於涉嫌犯法嘅受傷學生，就不乏讚美之詞，一時「讚」佢「為香港人站在前線抗爭」，一時又話要祈福、眾籌，仲有啲人繼續呼籲「齊上齊落」。囍雨想問，眼前呢個以身試法嘅教訓係咪仲唔夠慘痛、深刻？繼續漠視呢個最根本性嘅問題，係咪仲要鼓吹對抗、煽動犯法呢？

逆耳忠言 幾多人肯聽？

嚟到呢一刻，開槍事件已經發生咗，冇得「時光倒流」去改寫呢個客觀事實，講真果句，囍雨相信無論係政府、警方抑或市民大眾，都絕對冇人願意見到呢一幕。但係大家回想一下，當幾個月前就不斷有理性聲音呼籲學生青年遠離違法暴力、大力喝止「政治入侵校園」嘅時候，有幾多人認真當回事、聽入耳？當一班盲反派政客、喉舌媒體不斷咁慫恿後生仔女去「送死」嘅時候，又有幾多人堅定反對、譴責過？時至今日，已經出現只得十幾歲嘅少年身攜汽油彈、參與暴動襲警，依家被捕嘅後生仔年紀越來越細，照咁睇，眼前嘅「中槍事件」又似乎一切都有跡可尋、唔係偶然喎。

殺君馬者道旁兒

所謂「殺君馬者道旁兒」，如果要講「譴責」，囍雨認為最應該譴責嘅就係果班成日喺幕後美化暴力、煽動年輕人去做政治犧牲品嘅盲反派政客同媒體，囍雨實在唔知今日嘅「一粒子彈」，係咪足以令社會、學校、家長真正警醒、反思，不過囍雨就幾可肯定，如果成個社會再唔撥亂反正、檢討自己嘅責任以及對年輕人嘅教育，同類嘅不幸事件隨時又會「必然」發生，只不過冇人會知係咪次次都有「3厘米」嘅幸運呢？

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app