幾個月嚟大家最擔心會出現嘅事情，終於都無法避免地喺噚日發生咗，一個涉嫌參與暴動嘅中學生噚日喺荃灣衝突中被警方實彈射中受傷。事件發生後，各方聲音針對政府、警方嘅質疑、譴責、批評排山倒海，不斷渲染「近距離」、「真槍實彈」、「企圖謀殺」等字眼，甚至有人用上「行刑式」嘅描述，亦有網片以「慢鏡放大」聚焦開槍一刻。坦白講，現階段囍雨無意評論事件，不過就好想提醒一句，當大家作出任何判斷、下結論之前，係咪應該先清楚了解成件事嘅全貌呢？

警員舉槍 暴徒仍不停手

相信大家睇到嘅網片，多數都係一條時長大約30秒嘅版本，畫面始於幾個警員喺事發現場向一班黑衣暴徒推進。片中所見，一班暴徒正在圍毆一名倒地警員，此時四、五名警員擎槍持盾趕至，隨後幾個暴徒又開始向呢幾名警員展開攻擊。同一時間，圍毆倒地警員嘅暴徒仍在瘋狂暴打、拳打腳踢。呢個時候，一名警員舉槍指向一個黑衣人（中槍者），與此同時，呢個黑衣人仍雙手揮動鐵通打向持槍警員嘅手部，再之後，槍聲響起、暴徒四散、中槍者倒向果位一直被圍毆而未能起身嘅警員身上，而同一時間，另一個黑衣人企圖「搶犯」，想拖走中槍者，一名警員再衝前將其制服，立即再有暴徒向警員擲汽油彈，幸好無人受傷……

囍雨想話畀大家知嘅係，上述畫面的確係事發過程，但只係其中一部分，因為仲有一條相對更為完整嘅影片，更清楚顯示咗喺警員開槍之前，究竟發生咗咩事……

當警員生命受到嚴重威脅

當時一班黑衣暴徒如打游擊戰般遊走荃灣大河道，突然佢哋發現一名落單防暴警員，於是一邊借助掩護一邊從後逼近，追逐至事發地點，警員被推倒地，十幾個暴徒一擁而上，以鐵通、鐵鎚、甚至削尖嘅行山杖打向該名警員，此時幾個警員趕至增援，之後嘅事情就係大家所見到嘅畫面。簡單嚟講，成件事係因為有暴徒襲擊、圍毆警員在先，再有警員擎槍增援、拯救同袍，而且暴徒無視警告、繼續襲擊。大家唔好忘記，當時警員控制場面之後，仲有人返轉頭投擲汽油彈、喺幾個警員身邊不足半米處爆開。

睇過更為完整嘅事件經過之後，是非對錯大家都可以自行分析判斷，但囍雨想講嘅係，當依家有一啲聲音質疑警察點解要「近距離」開槍、點解唔「逐級提升武力」時，不如囍雨又提出一啲問題供大家參考下，例如如果暴徒唔係近距離襲警，警察又有冇需要開槍呢？如果唔及時制止暴徒，萬一有人成功搶槍，後果又會有幾嚴重呢？囍雨記得，之前發生過一單女警員開槍射中持?刀男士，事後仲有人質疑警員「亂開槍」、射人心口等等，但大家其實要諗下，喺電光火石之間，警察遇到危險時，其實係咪仲有「好多時間」考慮點自保呢？大家作判斷時係咪應該客觀理性啲呢？

原圖：Don Huh影片截圖

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app