過去兩日香港多區再度爆發激烈衝突，暴力升級程度沒有最高、只有更高，尤其噚日喺港島銅鑼灣、灣仔、金鐘一帶，所謂「火魔法師」（汽油彈狂徒）瘋狂縱火，大街小巷火幾乎處處汽油彈、處處火頭，由朝燒到晚。睇住呢啲畫面，囍雨腦海裡面浮現出「烈火焚城」四個字，呢個曾經只會出現喺戰爭年代或者電影裡面嘅場面，依家就活生生出現喺以法治文明著稱嘅香港社會、喺每一個市民身邊，囍雨喺度諗，再咁搞落去，搞出人命只不過係遲早嘅問題。

處處火頭 處處汽油彈

唔知大家有冇發覺，近排班暴徒已經將「火攻」當成佢哋嘅主要攻擊手段，而且無論係縱火定係掟汽油彈，「火力」都越來越強、越來越持久。就好似噚日喺灣仔、金鐘一帶，暴徒所到之處必有烈焰。除咗「例牌」向政總內駐守嘅警察投擲磚頭及燃燒彈之外，例如喺灣仔港鐵灣仔站，暴徒一番大肆破壞之後再次堵塞出入口縱火，而且喪心病狂地居高臨下向站內警察投擲多枚燃燒彈；喺金鐘道，幾個暴徒將拆除嘅國慶標語版當街縱火焚燒、形成火牆，跟住又向警方防線投擲大量磚頭及燃燒彈；直至入夜，暴徒仍唔肯收手，喺灣仔一帶繼續到處縱火，接二連三向警察投擲燃燒彈。

手拎石油氣罐走近火頭

睇過呢啲真實畫面，囍雨想問大家有冇諗過，若然任何一處火頭或者燃燒彈失控傷及人群，後果會有幾嚴重？囍雨好記得噚日喺灣仔，一堆焚燒緊嘅雜物突然間發生一下小型爆炸，所幸氣浪威力有限；同樣喺灣仔，一個暴徒甚至手拎石油氣罐準備走近火頭（幸好及時收手），如果發生爆炸，唔單自己有性命危險，附近嘅警員、途人、居民都可能成為受害者，分分鐘死人。大家仲以為呢啲係一班後生仔「玩玩下」咩？囍雨就話，佢哋唔單止想傷警、殺警，其他市民嘅性命安危同樣冇理過；佢哋根本已經係徹頭徹尾、走火入魔嘅暴徒！

面對呢班魔性大發嘅狂徒，囍雨再次懇請大家堅定支持警隊依法止暴制亂，因為時至今日如果仍然啞忍，等「燒到埋身」先知痛、恐怕成個香港已經「所剩無幾」；而對於企喺平亂最前線嘅警員嚟講，對佢哋最好嘅「保護」就全城齊反暴力嘅「民意之盾」。

盲反派 躲喺邊？

不過講到反暴力、止暴制亂，囍雨又想問下大家，當暴徒四處作亂之時，一眾盲反派政客又消失咗去邊呢？起碼囍雨就冇見過有一個人企出嚟譴責過一句啦，甚至仲有人繼續發放一啲不實資訊煽風點火。例如資訊科技界立法會議員莫乃光就喺社交平台誣衊「喬裝警察開真槍，假扮示威再放火」、工黨立法會議員張超雄就稱「用催淚水、水炮車和海棉彈和我們紀念雨傘五周年」等等。囍雨想請大家睇清楚呢班人嘅真面目，當暴徒肆虐全港之時，果啲喺幕後姑息養奸、助紂為虐嘅人，其實同暴徒又有咩分別？

原圖：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app