打從六月反對《逃犯條例》修訂開始，反政府人士就打住守護「自由」、爭取「民主」嘅旗幟，不過觀乎佢哋嘅一言一行，除咗高舉住「自由、民主」旗幟之外，所做嘅嘢點睇都似破壞自由同民主多啲；稍稍意見唔同，佢哋就圍毆、「私了」至頭破血流，如果係公眾人物，佢哋就去人哋嘅辦事處或店舖等大肆破壞。最新嘅例子，就係一名女子喺日前特首與社區對話發言後，俾人起底、抹黑；而被指「負責人」發表言論反對暴徒嘅某食肆集團，近日亦成為暴徒攻擊嘅對象，有破壞者仲要高調接受傳媒訪問，話某食肆集團「藍底」，要「好好懲罰它」。藍底、政見唔同，就要俾暴徒、示威者「懲罰」？呢個根本又係「私了」、「惡霸」邏輯！最後就係要令他人收聲！

公開發言 換來攻擊！

反政府人士所講嘅「自由、民主」，根本就唔係對等，或者尊重他人嘅自由，例如上星期有一位女士喺政府搞嘅社區對話發言後，即刻俾人起底，咩名、做咩公司等等，甚至有消息指話有人去佢工作嘅公司搞事，即係一同反政府人士意見不同，就要俾人「大力招呼」；與此同時，因為某人被指為某食肆集團「負責人」（事實並唔係），而某人發表咗反對暴力嘅言論，某食肆近期就不斷被暴徒破壞、滋擾，有破壞者仲要接受訪問「理直氣壯」表示要「懲罰佢」！原來，意見唔同，反政府人士就可以肆意妄為，用白色恐怖嘅方式要人滅聲。

反政府人士嘅「邏輯」，其實非常簡單，就係有人、知名人士表態支持政府及支持警察嘅話，如果係一般人，就起你底，欺凌你；如果你係知名人士，屋企仲有其他生意，咁你大件事喇，你家族生意包括食肆、咖啡室及食肆等等，就預咗俾暴徒「掃場」都得喇！但呢種「支持政府就要搞」嘅說法、做法，根本就係橫蠻歪理！政見唔同，可以討論，或者暴徒要杯葛人，其他人都無嘢好講，但幾時香港係變成政見唔同，就以用暴力欺凌、圍毆，或者喺網上起人底，製造白色恐怖嘅呢？

果位接受訪問，話要「好好懲罰」某飲食集團嘅年輕女子，想法同之前暴力對待客貨車司機、其他店舖嘅暴徒一樣，對於某啲人，佢哋可以毆打人身體，或用起底方式精神虐待他人；如果有生財工具呢？就梗係打爛你，等你識驚，亦令其他想出聲嘅人都驚，但廣男要指出，網上起底、攻擊人身、毁壞他人財物等手法，全部都係涉嫌犯法嘅行為，唔該班反政府人士作出任何行為之前，真係要諗清諗楚！

誰出賣港人？

反政府人士有一個說法，就係凡支持政府、警察嘅人，佢哋都會視為「出賣港人」，但香港人唔係全部政見一致，唔係全部贊成暴力破壞，政見不同，唔係可以肆意妄為嘅原因，反政府人士更無權自己「懲罰其他人」！如果個個「有理由」就去做自己想做嘅事，去「懲罰」佢覺得要罰嘅人，咁香港唔單止唔再係法治社會，而係倒退到蠻荒時代！

原圖：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app