如果大家留意近期嘅新聞，會發現反政府人士、媒體對於「私了」，即係用暴力、行私刑，都有一套講法或者一條「方程式」，就係每次有普通市民俾暴徒毆打，基本上都會俾人話係「先撩者賤」，所以暴徒打佢哋就變得「合情合理」。今日囍雨睇《生果報》，睇到一單休班警員喺屯門市廣場被圍毆嘅新聞，《生果報》嘅講法係〈疑影大頭 追打途人 休班一柴遭圍毆〉；囍雨想請問，因為「懷疑」乜乜、「懷疑」物物，所以就要俾暴徒圍毆？呢個就係反對派嘅「私了」邏輯！

變相助長「私了」

套用《生果報》引述「網民」嘅說法，呢名被圍毆嘅休班警因為「影人相」、與人爭執、被「懷疑」「想」打人、「攞鎖匙出嚟兇人」等等，所以就被圍毆，即係講到休班警挑釁在先，但囍雨只係想問一句，難道起爭執，暴徒就可以打人、「私了」？

首先，囍雨必須要指出，《生果報》所謂「網民」嘅版本，係咪真確大家都唔知；其次就係，當休班警「真係」影咗人相，同人起爭執，咁係咪代表暴徒可以打人先？呢種說法，同上星期喺元朗，有市民被打到頭破血流、然後仲要話佢「先挑釁」所以抵打一樣；囍雨實在擔心，如果呢個「私了」風氣繼續助長，以後暴徒必然橫行無忌，一唔妥其他人，就打！見到警察，就隨時再掟汽油彈！

模糊過程 混淆視聽

如果大家睇返《生果報》嘅道，發現佢將相當篇幅「寫」或者質疑暴徒嘅行為，但對於暴徒喺爭執過程有冇做啲咩過火嘢，又或者點樣圍毆受害人，《生果報》根本只係輕輕帶過；呢種報道方式，會產生一個非常唔好嘅效果，就係會令人誤以為受害者「有錯」，而施暴者「反應正常」。事實上，《生果報》過去幾個月嘅報道同評論，都係用緊同一套路，最離譜嘅例子，就係將掟汽油彈狂徒講成保護示威者嘅「火魔法師」，同埋將主動襲警嘅暴徒形容為「英雄」

囍雨一直覺得，如果無部分市民、媒體嘅「支持」，一班暴徒根本就唔敢不斷將暴力升級，而《生果報》作為盲反派頭號報紙，美化、鼓勵暴力行為，又為「私了」行為護航，令人誤信訴諸暴力「無問題」。囍雨想講，大家去判斷「私了」行為時，應該諗一諗，「私了」除咗加劇矛盾外，有解決啲咩問題、紛爭呢？ 對爭取佢哋所謂嘅「訴求」，又有咩關係呢？

原圖：網路圖片

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app