近日，一名男子懷疑因為有刑事案件在身，受唔住壓力投海自盡，佢嘅家人講明死者因為涉案「睇唔開」自殺，但網上不斷有留言係講到死者被警察「謀殺」，有大批人士受感召去海傍鞠躬，有啲甚至一家大細去拜祭。廣男就喺度諗，乜依家有人身亡，只要有人喺網上「吹幾句」，啲人就覺得係警察「殺人」喇？成日話「謠言止於智者」，依家嘅香港人，單單睇幾句網絡留言就會得出有違常理嘅判斷？廣男覺得，呢啲假新聞、謠言，除咗煽動仇恨、加劇矛盾，對香港根本百害而無一利。

16人被殺？全部都係假！

以上講果位自殺而被人講成警察「謀殺」嘅男子，只係其中一例，之前8.31太子站衝突，一樣有人話有人俾警察「打死」；最離譜嘅講法，係話「8.31」加埋「新屋嶺」共有16人被警察「打死」、「殺死」！不過，當傳媒細心查證，包括去所謂名單嘅地址作查證後，發現根本無人死！點解會出現呢啲咁離譜嘅假新聞？當中原因好簡單，就係有人有心造謠，想煽動他人仇警情緒，同時不排除想衝突繼續升溫！

一切只為挑動矛盾

所謂反修例行動，雖然暴徒嘅暴力手段不斷升級，但如果大家細心留意一樣嘢，就係比起6月、7月行上街嘅人，其實人數係越嚟越少，咁係咪代表啲人已經「滿意」政府撤例？當然未必，但行出嚟嘅人數減少，反映反政府一方、激進示威者甚至暴徒所聚集嘅民氣已經有啲減弱，佢哋嘅行動「再無突破」，後果就係無以為繼。最省時、有效能激起其他人抗爭情緒嘅手法，就係妖魔化對方（即係政府、警察），所以之前大家見到網上留言話警察「打死人」、「棄屍」等等，都係挑動矛盾嘅策略。

只要能夠挑動到其他人情緒，就可以「保持」反政府行動甚至暴力行動嘅「溫度」，不過發出假消息嘅人，所發放嘅消息實在「太假」，傳媒只要細心查證，就會知道原來所謂「死人個案」，根本就唔存在。最慘嘅地方，係竟然有唔少人「相信」呢啲謊言，到底佢哋係相信呢啲謊言，定係純粹唔相信政府、警察所以選擇「相信」呢啲有違常理嘅大話，廣男唔清楚；但廣男可以肯定嘅係，呢啲謊言對警察造成傷害，對香港亦造成傷害，如果有人係都要相信呢啲所謂「警察殺人」嘅謊言，廣男要同你講句，你已經中咗計，因為散播謠言嘅人，就係想利用你！ 

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app