反政府人士是最有「良知」的，反政府人士是最「正確」的，點解？因為無論佢哋做乜，都會話自己係啱嘅，包括「私了」、毆打意見不同者至頭破血流！好似日前有市民喺元朗被瘋狂圍毆咁，事後就有人話係因為被毆人士「挑釁」在先，過氣藝人何韻詩，甚至指被毆人士「演技果然受過專業訓練⋯⋯」；但另一邊廂，當民主黨立法會議鄺俊宇受襲時，佢就話「白色恐佈、黑社會政權」云云。咁即係點，暴徒打人，何韻詩就話受害人「演技好」，喺受害人傷口上灑鹽；到自己人受襲呢，佢就話係「白色恐怖」。呢啲係咪雙重標準？何韻詩仲有冇良知呀？！

市民在元朗被瘋狂毆打

對於何韻詩話喺元朗被毆打嘅人「演技好」或者「受過專業訓練」，大家首先要問下何韻詩，有冇了解清楚當日發生咩事先？當日暴徒喺屯門破壞完一輪之後就踩入元朗，有暴徒同何韻詩「揶揄」果兩位中年男子起爭執，就算有鏡頭影住，啲暴徒都出「連環拳」瘋狂圍毆其中一名男子，直至血流披面，之後甚至有女暴徒用疑似鐵架襲擊男子頭部，之後仲要有人問該男子想死做乜「唔自殺」。對於一個被襲者、受害者，何韻詩無半點同情，都算喇，仲要揶揄人哋「演技受過專業訓練」？何韻詩仲有冇良知？！

更諷刺嘅地方，係當有新聞話鄺俊宇受襲嘅時候，何韻詩又即刻喺社交平台「抽水」，稱呢啲係「白色恐怖」、「我地係唔會咁容易俾你地啲卑鄙手段嚇到㗎」；咁大家真係要問下，普通市民俾人打就唔係「白色恐怖」、「卑鄙手段」，但當自己人俾人打先稱得上做「白色恐怖」呀？諸如何韻詩之流雙重標準到呢個地步，真係令人極度心寒！

不譴責暴力 不割席

如果何韻詩等人真係如此痛恨暴力（民主黨亦有譴責襲擊鄺俊宇嘅人），咁眼見其他人被襲擊、圍毆，點解佢哋唔出聲？唔譴責暴力？又唔同暴力割席呢？香港今日之所以咁亂，暴力行動偏佈社區，多多少少都係因為班暴徒背後有政客撐腰，製造輿論為佢哋護短。今日何韻詩等人包庇「自己友」用暴力、濫用私刑；將來任何人都可能成為暴徒嘅攻擊對象。當香港變成一個暴力社會，蠻不講理，果啲所謂「愛香港」嘅反政府政客，根本就係想香港陷入萬劫不復之地！ 

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app