見到「魔法師」呢個字，真係會令人有無窮嘅想像，感覺就好似啲動漫入面嘅「鋼之鍊金術師」咁；不過囍雨有關「魔法師」嘅觀念，今日就俾《生果報》完全扭曲咗，因為對於縱火暴徒，今日佢哋有報道稱之為「火魔法師」，仲訪問咗一個所謂「火魔法師」，講到佢哋掟汽油彈、放火只係「防守」咁。但事實係，好多縱火暴徒，根本就係主動掟汽油彈、明顯向攻擊警察，意圖謀殺，《生果報》咁樣美化暴徒，根本就係超過分，已經超越人類道德底線！呢啲「美化」、「浪漫化」暴徒嘅字眼，好可能會助長暴力，大家一定要小心警剔！

暴徒不是打機 人命不會重生

對於《生果報》訪問嘅縱火暴徒講啲乜，囍雨就唔仔細地喺度幫人宣傳喇，但囍雨必須指出，掟汽油彈、縱火，唔係一件小事，而係分分鐘會搞出人命嘅嚴重罪行，果位化名接受《生果報》訪問嘅所謂「火魔法師」，到底係咪清楚自己做嘅嘢會帶嚟咩後果？縱火唔係打遊戲機，打機死咗人可以復活，但現實世界人命唔會重生，而且分分鐘要付上刑責。就算啲縱火暴徒預咗坐監，但如果佢哋掟嘅汽油彈傷到人甚至燒死人，無論佢哋本身願意付上咩代價，根本都彌補唔到所犯嘅過錯！

至於講到啲縱火暴徒「只守不攻」咁款，囍雨則要指出，無論係《生果報》嘅報道，以至果位「火魔法師」所講嘅，都係以偏概全嘅歪理。囍雨近期睇唔同新聞，睇到有馬路上嘅警員，俾暴徒圍住嚟掟汽油彈，又睇過暴徒向港鐵站內密集嘅警員掟汽油彈；甚至去到日前，都仲見到新聞影片見到啲暴徒「喺無安全威脅」嘅情況下喺港鐵站向警員掟汽油彈，好似想謀殺咁款！喺呢啲情況，縱火暴徒旨在等「手足撤退」？唔好玩啦！而且喺某啲情境，已經多次發生縱火暴徒甚至連自己都燒到，如果反政府要反到將自己、警員同其他市民嘅生命做「賭注」，真係好難得到人認同。

縱火可被判終身監禁

就如《生果報》自己都報道，縱火係嚴重罪行，最高到罰係終身監禁；既然如此，《生果報》點解仲要用報道、專訪去美化、英雄化呢啲犯罪行為呢？暴徒掟磚，《生果報》稱為「義士」；年輕人去衝，《生果報》美化做「衝衝子」；暴徒主動打警察，《生果報》稱人哋為「英雄」；依家有人縱火，《生果報》好意思叫人做「火魔法師」？《生果報》唯恐天下不亂，就不惜煽動年輕人「以身試法」，香港最大禍端，唔係暴徒或年輕人，而係一直喺背後煽風點火、火上加油嘅政客同傳媒！ 

原圖：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app