香港騷亂至今逾百日，非但見唔到有平息嘅趨勢，反而暴徒暴力仲不斷激化、升級。如果問依家呢班暴徒有幾恐怖？囍雨就一定會答：佢哋已經「狼」到可以殺人。就好似剛剛呢個周末，「黑衣風暴」唔單止繼續侵襲全港多區，仲發展到有人圍毆警察、企圖搶警槍、向警車掟汽油彈、強闖地鐵控制室、向路軌擲雜物等等。一句講嗮，就係對住警察要打要殺、對市民生命安全同樣唔理唔顧。大家諗真啲，呢啲行為同謀殺有咩分別？

為搶犯 企圖搶槍

相信大家喺傳媒畫面都見到，上個星期六屯門嘅示威遊行結束之後，例牌又係一班黑衣暴徒開始肆虐之時，破壞鐵路設施、拆圍欄設路障、向警方防線掟磚掟汽油彈都已經係「家常便飯」。但令人更加髮指嘅一幕係，當日兩名防暴警喺屯門市廣場對開嘅屯門公路緝捕暴徒時，引嚟大批暴徒圍攻搶犯，其間有暴徒已搶去警員警棍、不斷施襲，另一個揹藍色背囊嘅暴徒一埋警員身就狂扯警員腰間佩槍，幸好同袍及時趕到，暴徒才未能得逞。

同樣驚心動魄嘅仲有當晚喺元朗嘅一幕。係日前入夜後部分暴徒喺元朗大馬路堵路縱火，更至少3次向兩輛駛經警車投擲汽油彈；約九點半左右，一輛警車駛經鳳翔路一個燈位時，突然有暴徒竄至警車前、將手中汽油彈直接掟中警車，瞬即有火舌由車底冒出；警車駛離過程中，車胎仲如「風火輪」般著緊火。

大家以為呢班暴徒淨係針對警察咩？錯！佢哋根本冇考慮過市民嘅安全。囍雨印象最深嘅就係星期日暴徒暴走多個港鐵站嘅過程中，有人去到南昌站外一個天橋、直接向路軌掟雜物；之後又有人喺該站闖入一列開往東涌方向列車嘅車尾駕駛室，並將緊急落客斜道放落路軌，又向路軌投擲雜物，導致該線服務嚴重受阻。

唔會顧及市民安危

睇過呢啲暴行，大家有咩感覺？囍雨就好想問句，呢班暴徒究竟有冇考慮過後果呢？例如搶槍，大家諗下，如果畀個暴徒得逞，爭執過程中絕對有可能擦槍走火，到時無論警員抑或在場人士、甚至暴徒自己條命都「危危乎」；又例如向警車掟汽油彈，眼見車身車胎都著火燃燒，如果不幸燒到油箱引致爆炸，車內警察必定受傷甚至喪命，假如汽油彈擲中附近車輛或路人，後果又會如何？至於強闖列車駕駛室、向路軌掟雜物就更加唔使講，大家唔好忘記，當時車上仲有好多乘客，一旦車毀不堪設想……

講到呢度，囍雨想請大家認清一點，就係唔好再「奢望」忍一時、讓一步，呢班亡命之徒就會有「收手」之日，大家唔好忘記，之前佢哋已經開始近距離向警察掟汽油彈、圍毆市民，發展到今時今日更加變本加厲，連滿載乘客嘅列車都成為佢哋嘅目標。面對呢班似乎想謀殺、意在「搞出人命」嘅暴徒，囍雨認為最好嘅辦法就係大家一齊敢於喝止暴力之餘，仲要支持警方以有效手段止暴制亂。囍雨更加想請果啲到依家仲對暴徒行為表示「同情、理解」嘅市民睇清楚，你同暴徒講仁慈，對唔住！暴徒冇諗過同你講人性！

原圖：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app