「『岳』英雄是第一個不再被動挨打的人，他選擇了反抗。這種反抗在當今境況下，是被民意接受的。」大家睇到呢段說話，有咩感覺？係咪覺得打人、打警察已經變得「天經地義」？講出呢番話話嘅人，就係《生果報》《果籽》一篇專欄文章，囍雨就喺度諗，原來今時今日襲警，會被人稱為「英雄」，而且民意亦接受咁做。《生果報》評論員以至其專欄作家，為咗反政府，原來已經唔止唔講道理，而係扭曲事實、將歪理變成真理。

不是反抗 是主動襲警！

《生果報》呢篇文章，話果位打警察嘅「岳」英雄為咗「保護」其他示威者，一夫當關，抵擋警察，甚至話佢「無私無畏」、「打動了無數人」，講到呢位「岳」英雄咁偉大，囍雨首先要問下，當日發生咩事先？

話說日前警察喺港島區某停車場附近，有警員正在拘捕懷疑違法人士，當有警員走過果位衣服背面印住個「岳」字嘅青年後（當時警察似乎唔係好似要拘捕佢），呢位青年望一望記者，然後突然襲警，攞出一支狀似伸縮警棍嘅東西主動「扑」警察，同警員打起上嚟，之後逃走，繼而被制服。成個過程，明顯就係有人主動襲警，而且係攞出不知名棍狀物體想「狂打」警察，企圖令在場被捕的其他暴徒逃脫，專欄竟然話呢個「岳」字青年「第一個不再被動挨打的人，他選擇了反抗」、「一夫當關，抵擋警察」，係咪想扭曲事實、誤導他人呢？

英雄化暴徒

除咗事實問題，《生果報》、《果籽》（屬《生果報》）嘅評論員、專欄作家，不斷喺度美化暴徒，甚至英雄化暴徒，到底意欲何為呢？係咪覺得依家仲係「太少」年輕人甚至學生被捕、被告，要多啲年輕人「犧牲」，以達到佢哋嘅政治目的，先善罷甘休？老實講，唔譴責暴徒、暴力已經令人憤慨，不斷美化、鼓吹暴力行為，就更加令人不齒！

一直以嚟，暴徒暴力不斷升級，除咗因為佢哋稱自己有訴求一定要「爭取到底」之外，一個更重要嘅原因，係因為近月一直有政客、媒體喺背後不斷煽動、美化暴力行為，令到激進示威者、暴徒真係覺得自己無做錯，甚至連襲警、掟汽油彈都好似做緊「正確的事」咁；如果訴諸暴力是無可避免，而暴力行為又咁值得「表揚」，點解《生果報》老闆黎智英同其他評論員、專欄作家，唔自己親身上陣呢？ 

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app