所謂長江後浪推前浪，唔知係咪因為香港老一代嘅盲反派開始要「退落嚟」，近期盲反派就出現咗一班「新力軍」，代替老一代去外國唱衰香港，當中嘅表表者，就一定要數到「香港眾志」黃之鋒，佢繼去台灣、德國後，近日又去咗美國，向美國爭取通過《香港人權與民主法案》以「制裁」香港。唔知黃之鋒係咪興奮過度，佢噚晚竟然喺社交媒體話「繼訪台、德、美，本月四度被中國外交部批評，實在是與有榮焉」；「賣國」俾人鬧仲要話自己「與有榮焉」？睇嚟黃之鋒相當享受做「漢奸」喎！

去外國無問題 但請講出事實

講真，盲反派政客要去邊、做啲咩，呢啲係佢哋嘅人身自由，就算佢哋要「賣國」，其他人都唔可以對佢哋做啲咩；不過，廣男想講黃之鋒去到香港以外嘅地方，講嘅唔係事實，老屈咗中央或者港府呢個先係大問題。例如佢之前喺德國，就話香港要根據《中英聯合聲明》實踐民主選舉，但《聲明》所寫嘅，根本只係話行政長官通過「選舉或協商產生，由中央人民政府任命」，即係話根據《聲明》特首由「協商」產生都得，咁黃之鋒所謂要「根據」《聲明》如何如何，根本就唔係事實！

至於今次黃之鋒請求美國「搞」香港，當外交部批評佢嘅時候，佢竟然仲話「與有榮焉」，呢種到底係咩心態呢？即係話如果國家讚賞自己，佢就無乜高興感覺喇，反而如果國家批評佢，佢就覺得好光榮，因為咁樣表示佢盲反派「代表」嘅地位穩固？呢種心態、心理，廣男真係唔識得理解，或者對於崇洋媚外嘅政客而言，最重要嘅係外國勢力嘅重視，特區政府以至中央政府點睇佢，一啲都唔重要！

港人自由受打壓？

另外，黃之鋒喺社交媒體度仲聲稱外交部「無謂充分暴露其不可告人，打壓港人自由的政治用心」，廣男又唔明白，港人嘅自由幾時被打壓過，如果港人自由狀況出問題，諸如黃之鋒之流仲咁「來去自由」、可以日日鬧特區政府同中央？仲可以「有案在身」都仲飛到去唔同地方唱衰香港、中央？講真，如果香港人自由出問題，其實要多謝一班激進示威者同暴徒，佢哋處處破壞，搞到香港人出入各區都成問題，甚至會被暴徒襲擊，話時話，點解唔見黃之鋒譴責暴徒暴力嘅？ 

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app