好心，有時的確會做壞事。好似浸大校長錢大康咁，之前浸大學生會會長懷疑違法被捕，錢大康出嚟聲援佢，到第二次再有學生被捕而錢大康唔願意「聲援」，就俾班學生重重「狙擊」。相同道理，當然「放諸四海皆準」，港鐵之前安排「專列」載走滋事示威者、暴徒，到最近佢哋「撥亂反正」，唔再為暴徒「服務」，就成為咗暴徒嘅攻擊目標；港鐵主席歐陽伯權接受訪問，就話當初「暴徒列車」嘅安排「好肉酸」，依家同暴力割席反而成為被針對對象。不過，歐陽伯權就直言，港鐵唔會畏縮，並會繼續支持警隊維持治安。

開車送走食「霸王餐」的人？

歐陽伯權喺接受傳媒訪問嘅時候，作出一個幾有趣嘅比喻，就係港鐵之前喺暴力衝擊期間，安排列車接載施暴者，有關影像「好肉酸」，好似「有人在餐廳吃完東西不付錢還大肆破壞，仍找車送他回家」一樣。當港鐵之後改善安排，唔再安排「暴徒專列」，港鐵就成為暴徒破壞目標，歐陽伯權就指出，至今港鐵已經有90多個車站設施受損毀，估計財政損失高達數千萬元。囍雨就喺度諗，如果港鐵由一開始就無安排「暴徒列車」，等啲暴徒無預計港鐵一定會「幫佢哋」，可能今日港鐵就唔會發生咁多事。

講真，囍雨認為，無論係港鐵好、大學校長好甚至中學校長同教師都好，由始至終都唔應該對激進學生、示威者、暴徒作出任何支援及包庇，因為當你支援啲暴徒（或者講得中性啲，涉嫌違法或者破壞人士）一次，咁你第二次幫唔幫佢哋呢？如果第二次都幫，係咪以後都要幫呢？咁同成為暴徒嘅「同路人」，有咩分別？

更重要嘅係，本住「是其是，非其非」嘅原則，當一班暴徒肆意破壞、目無法紀，正確嚟講係一次都唔應該幫佢哋，因為出手支援佢哋，可能向社會釋出錯誤訊息，就係原來某機構、某校長等等都支援佢哋，可能班暴徒係「啱」喎！所以無論係港鐵或者其他機構、人士，應該由一開始就向暴徒說「不」！

全社會應與暴力割席

要避免被暴徒等「反咬一口」，囍雨覺得無論任何情況，大家都應該拒絕與暴力人士合作，要同暴力割席割得清清楚楚；甚至為咗香港能夠止暴制亂，應該一齊譴責暴徒、暴力，等暴徒知道，香港人唔同意佢哋做法，更唔會包庇同縱容佢哋！ 

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app