之前有社會人士發起「803懸紅報料網」，懸紅緝拿6月以來各區暴力衝擊、侮辱國旗、國徽等人士，舉報人士如果令涉事人最後被滿意檢控，將會獲得最高100萬嘅賞金，引嚟各方熱議；「803行動」今日喺幾份報章再刊登廣告，表示已經收到近300宗可跟進嘅報料，同時新增3宗大額懸賞。囍雨就覺得，「803行動」發起唔夠一個月時間，就收到300宗報料，證明懸紅緝拿暴徒呢招Work，社會各界人士如果有料在手，應該快啲舉報暴徒，一可收取懸賞，二則為香港止暴制亂！

新增四宗懸賞

之前「803行動」面世，好多人都對「行動」讚口不絕，因為行動除咗包括唔同嘅暴力衝擊事件，連7.21元朗衝突以至尖沙咀「傷眼女」事件都喺懸賞之列，有分析認為呢個懸紅行動不分「顏色」，值得支持；今次「行動」新增四宗懸紅事件，包括 ：一）提供「黑衣暴力運動」嘅資金來源同後勤支援等資料，可獲賞金達100萬元；二）非法製造、貯藏、運送或使用汽油彈嘅資料，賞金高達50萬元至100萬元；三）提供大功率鐳射槍非法販賣或購買資料，可得賞金10萬元；四）有女子在地鐵車廂亂貼標語，賞金1萬元。如果有人就呢四單懸賞報料（另有衝擊立法會暴徒梁繼平嘅行踪），尤其係針對第一單提供有用資料，話唔定執法部門可以「直搗黃龍」，追查到策劃、支援一連串暴力行動嘅黑手都未定。

「黑衣人」舉報自己人？

單從數字而言，「行動」發起唔夠一個月，就已經有近300宗可以跟進嘅報料，證明咗懸紅呢招有用，囍雨甚至大膽估計，除咗有市民就手頭上資料作出舉報外，能夠提供「可跟進」嘅資料，相信當中一定有啲舉報人係「黑衣人」，又或者係佢哋身邊嘅親朋戚友；如果再多啲人包括「黑衣人」、「黑衣人」親友報料，甚至提供背後黑手、策劃人嘅資料，咁一連串破壞香港嘅暴力行動，就算唔被警方瓦解，破壞力都肯定會大大減弱。

除咗攞懸賞之外，囍雨必須要指出一點，就係舉報暴徒、違法人士，其實係為香港止暴制亂出一分力，依家大部分暴力、激進示威者以為自己蒙咗面就可以為所欲為、無法無天；如果有熟知犯罪內情嘅人士作出舉報，呢班蒙面暴徒隨時會被拘捕，咁社會就少一啲暴徒，香港要回復安寧就更有希望。所以呢，為懸賞好，為香港也好，如果大家手頭上有有用嘅報料，記得上803.hk舉報暴徒，再收懸紅！ 

原圖：港人講地

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app