經過香港幾個月嘅亂局之後，可能大家都逐漸睇清楚，依家一班亂港分子嘅「文攻武鬥」，就係有激進暴徒喺香港打爛頭家、而盲反派政客就去唔同國際場合唱衰頭家。就好似呢幾日咁，除咗有公民黨立法會議員陳淑莊去聯合國人權理事會「控訴香港警察」之外，仲有香港眾志秘書長黃之鋒同過氣歌手何韻詩去出席美國國會嘅聽證會。當呢班人不斷咁「周遊列國」、接力唱衰香港時，廣男覺得大家必須要把握一個大前提，就係佢哋所講嘅係咪事實呢？

以偏概全的「控訴」

例如之前當陳淑莊喺聯合國講到香港警隊「暴力加劇」對付示威者時，廣男第一句就要問，陳淑莊又有冇講清楚警察點解要使用武力嘅來龍去脈呢？又例如當黃之鋒喺美國嘅聽證會上危言聳聽、講到香港由「一國兩制」慢慢「已經危險地接近『一國一制』」時，大家應該提醒下佢唔好忘記，佢依家仲享受緊「一國兩制」所保障嘅自由周圍唱衰緊香港喎；仲有，當何韻詩援用「被捕人士最年輕只有12歲」嘅例子去控訴警察「不惜一切鎮壓示威」、「『年輕』在香港已是罪名」時，大家又必須問一句，佢又有冇同美國政客講，依家香港有啲青少年就係因為被「違法達義」歪理所害，搞到手持鐵棍、身攜汽油彈去「示威」呢？

所以當聽完佢哋周圍講咁多嘢，大家有冇發覺有咩共通點呢？廣男就覺得，佢哋除咗不斷唱衰香港、中國之外，又好似完全冇提過一句暴徒暴力喎！其實大家都有眼見，依家啲暴徒不斷將暴力升級，已經去到足以殺人嘅程度，例如近距離向警察掟汽油彈、縱火燒港鐵站出入口等等，全部都係罔顧人命嘅暴行，但呢班政客又隻字不提喎，究竟點解呢？廣男就話佢哋根本係以偏概全、誤導國際。不過何韻詩有句話廣男都認同，就係佢形容依家香港人「活在恐懼中」，冇錯啊!咪就係嚟自對黑衣暴徒嘅恐懼囉！

美國政客叫盲反派「加油」

另一個問題係，廣男睇報道話出席美國國會聽證會嘅除咗黃之鋒、何韻詩之外，原來呢個「唱衰團」成員仲包括香港大專學界國際事務代表團發言人張崑陽、以及「中國人權」執行主任譚競嫦等，廣男又真係唔理解喇，既然要去講「香港問題」，點解全部係一啲反政府反國家嘅人士呢？大家覺得由佢哋扮代表去講「問題」又係咪公平呢？佢哋係咪代表暴徒發言呢？廣男就必須講一句，他們不能代表我！

不過有啲美國政客，例如民主黨眾議員麥高文（Jim McGovern）及參議員魯比奧（Marco Rubio），又似乎對呢個反中亂嘅陣容好「欣賞」咁喎，仲叫佢哋「加油」添，問題係香港依家已經亂成咁，喺呢個時候仲叫呢班人「加油」，係咪等於叫佢哋繼續努力破壞呢？大家不如又估下啲美國政客係度算計緊啲咩？

原圖：黃之鋒Facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app