示威者衝擊？係政府「造成」！暴徒掟汽油彈？係警察「濫暴」！以上歪理，由盲反派政客同反政府人士提供。近期無論激進示威者、暴徒嘅暴力行為有幾過分，呢班人基本上都係將所有責任推卸俾政府、警察度；好似公民黨立法會議員陳淑莊咁，日前就去咗聯合國人權理事會發言「控訴警暴濫權」，藉以打壓港人言論自由。對於呢啲歪理，廣男都係果句，點解警察執法要使用武力呢？陳淑莊可唔可以講清楚啲？

逐點擊破陳淑莊

陳淑莊去聯合國，講人權、警察，內容大概會講咩、所指控嘅係咩人，大家就算唔睇報道都估到七、八成喇；不過，陳淑莊對警方嘅種種指控，有啲廣男覺得可以回應下。例如佢講警方用「布袋彈射盲一名救護員眼睛」，廣男真係想問下，陳淑莊肯定果位人士隻眼，係俾警察射嘅？如果陳淑莊所講嘅係果個喺尖沙咀被射傷眼嘅女子，佢好似阻止警方調查事件，依家連邊個射親佢都未肯定，陳淑莊咁快就有「結論」，仲要喺聯合國「講呢啲」？

至於陳淑莊喺聯合國提到警察喺「襲擊無辜的港鐵乘客」，廣男又要質疑下，陳淑莊有冇將喺太子站（相信佢係講緊呢單啦）整件事嘅脈絡講清楚呢？例如有示威者、暴徒走入太子站破壞、襲擊乘客、搶手機、攞滅火筒噴人等等，然後警方先入太子站執法呢？如果陳淑莊無講清楚，係咪以偏概全？仲有，陳淑莊特別強調警方至今射咗幾多催淚彈，點解佢又唔講下示威者、暴徒掟磚頭、汽油彈呢？唔計無數嘅磚頭，啲暴徒近期掟嘅汽油彈數以百計喎！

誰人影響自由

最後，當陳淑莊講到自由嘅時候，到底依家係邊個影響香港市民嘅自由？市民搭車返工、返學，隨時遇上不合作運動；喺唔同社區活動，隨時又遇上暴力衝突，甚至有暴徒連路人都打；假日想出街、去市區？就算出到去，都唔知有冇混亂，同唔知會唔會因為暴力示威而無公共交通工具返屋企。陳淑莊講得啱，依家的確有人打壓緊港人自由，但呢班人係一班周圍破壞嘅暴徒，以及喺背後支持佢哋嘅無良政客！ 

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app