以前國家與國家之間打仗，啲人會話戰場兵荒馬亂、子彈橫飛；今日喺香港發生嘅暴力衝突，則可以用汽油彈「橫飛」去形容，有報道話喺日前嘅暴力流血衝突，啲暴徒掟咗成80個汽油彈（單計金鐘），大家可以想像到，只要當中有「一個」汽油彈正面掟中警員，警員就性命堪虞。喺呢個前提底下，有警員組織認為受到「致命攻擊」時可以用相應武力、武器制止，包括「實彈槍械」，就立即引嚟批評，甚至有組織話警察錯誤及不法使用武力可能要付刑責。對於警察錯誤、不法地使用武力可能要負刑責，囍雨同意，但只想問一句，點解呢啲組織唔講下暴徒掟汽油彈，又要負咩刑責呢？

對於有警員組織話有必要時「荷槍實彈」應付暴徒，個別人士、組織會攻訐警方，基本上係意料中事，例如「民權觀察」就話擔心警民對立，混淆警員對使用致命武力指引嘅理解，稱「任何警員必須為自己使用武力的決定負責，錯誤及不法地使用致命武力可令其負上刑責」；而所謂「香港人權監察」，就話「若警方貿然將武力升級造成人命傷亡，決策者和縱容者都要為危害人道罪行負責」。當呢啲組織不斷講警察如果錯誤使用武力有咩刑責或者責任嘅時候，囍雨只想問一句，暴徒嘅責任呢？

暴徒才是問題根源

睇返成件事嘅脈絡，有警員組織之所以有呢個意見，完全係因為暴徒暴力不斷升級，之前就掟磚、掟鐵枝，近期覺得磚頭、鐵枝都「唔夠激」，索性將汽油彈變成為主要「武器」；單單係剛過去嘅周末，就有暴徒追住警員嚟掟汽油彈，好似要攞人命咁，要警員擎槍警告先四散，而喺某港鐵站，甚至有暴徒喺狹窄嘅梯間，向警員掟汽油彈，分分鐘釀成慘劇。喺呢啲致命暴力嘅威脅下，呢啲所謂「民權觀察」、「人權監察」嘅組織，竟然唔譴責暴徒，反而不斷質疑警方，呢啲係咩玩法？唔通所謂「民權」、「人權」，係包括掟汽油彈嘅「權利」？咁公平咩？客觀咩？

見到呢啲顛倒是非嘅言論，囍雨覺得無論係呢啲人權、民權監察組織，抑或係盲反派政客等等，根本就係包庇暴力、縱容暴力！如果真係反對暴力，以至反對致命暴力，最應該做嘅事，就係先譴責暴徒暴力，然後宣布組織同暴徒暴力割席，但呢啲組織、政客無咁做，係佢哋唔知道暴徒疑似「謀殺」？唔係，係佢哋根本同暴徒係同一夥人，甚至可以話係暴徒嘅「一分子」。香港今日之所以咁亂，除咗喺「前線」嘅一班暴徒作亂，其實仲有班「黑手」喺背後不斷縱容、煽動！ 

原圖：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app