先同大家分享幾個囍雨印象深刻嘅畫面：日前一位淘大女街坊因為「被懷疑」唱國歌、撐警，結果被一班黑衣示威者圍攻、跌落扶手電梯，門牙飛脫要送院治理；噚晚粉領一位「愛港」阿伯因與示威者爭執被打傷，之後仲要被兜面噴黑漆；再早幾日，一位喺淘大商場參與唱國歌嘅男教師，同樣被示威者襲擊、面部受傷流血……過去幾日，呢啲示威者暴力對待意見不同者嘅事件不斷出現喺鏡頭之前，囍雨同所有真心愛香港嘅市民都要問，當依家香港社會有人口口聲聲話要追求民主、自由時，呢啲訴諸暴力嘅行為又係咪我哋心目中嘅「民主、自由」社會呢？

吹雞、拖馬 打壓異己？

近排大家都見到，好多示威者去到香港各大商場高聲「唱歌」，表達反修例、反政府訴求，同樣地，一班不甘沉默嘅市民同樣以唱國歌嘅方式表達愛國愛港情懷，但結果係點？相信大家都會對日前喺淘大商場發生嘅互毆場面印象深刻，囍雨今日聽到一位當日目擊事發嘅淘大居民喺電台節目講到，當日一班人手持國旗開始唱國歌時，已經有示威者喺網上「吹雞」，結果就演變成兩邊互毆、多人受傷，包括中年女士、長者甚至一啲可能只係路過嘅無辜市民。囍雨喺度無意再複述暴力、血腥嘅畫面，但就要反問一句，當示威者周圍「唱歌」時，又有冇人「吹雞、拖馬」去挑釁、撩交打呢？

囍雨記憶所及，當示威者「表達」緊佢哋嘅「歌聲、訴求」時，其他市民即使有唔同意見，都係展現尊重、最多選擇避開，而唔係故意生事。但點解表達愛國就要被打呢？甚至囍雨聽過之前有示威者已經揚言「唔係香港人」，打！講嘢有口音，都打！囍雨想問，依家香港社會係咪已經野蠻到只要意見唔合、政見唔同或者非我族類，就要都被打壓直至徹底滅聲為止呢？大家可以睇下，之前有人針對警察及家屬嘅網絡起底、欺凌係咁，依家對待唱國歌者又係咁，甚至直接大打出手。呢班示威者甚至暴徒針對市民嘅武鬥姿態，究竟係想點呢？

社會暴戾如蠻荒世界

其實近幾個月嚟，每當睇到呢啲「相煎太急」嘅畫面，囍雨都覺得好心痛，每一位生於斯長於斯嘅香港人不妨回想一下，香港過往咁多年嚟，何曾出現過一言不合、政見不同就如此訴諸暴力呢？大家唔好忘記，今時今日香港嘅民主、自由程度已經相當進步，甚至領先世界，但點解反而會有呢啲暴力場面發生、好似倒退返蠻荒世界咁呢？囍雨覺得，或者每一位真心愛香港嘅市民都係時候要認真睇一睇、諗一諗，果班成日高舉「民主、自由」嘅人，佢哋自己又將香港破壞成點呢？至於一眾所謂意見領袖及盲反派議員，一直拒絕與暴力切割，佢哋已經成為暴力幫兇，必須為香港嘅淪落負上一定責任！

原圖：RTHk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app