炎炎夏日，囍雨發覺近排啲反修例示威者似乎少咗走上街頭，但就多咗「轉移陣地」去全港各大商場、一邊嘆冷氣一邊「唱歌」，藉此表達反政府訴求，搞到啲青年、學生又學埋一份。囍雨今日就睇到一條網片，係成班後生仔女好興奮咁喺一個商場裡面大唱侮辱警察嘅粗口歌。囍雨睇完真係好嬲！乜原來依家啲學生係咁樣嘅咩？點解學校、家長、大人又可以完全唔出聲、唔制止，連是非對錯都唔敢講呢？簡直離嗮大譜！囍雨真係要問句，呢啲就係香港未來嘅主人翁？

著住校服唱粗口歌

由條網片可以見到，成班人好似開Party咁、喺個商場裡面打嗮拍子、又唱又跳；男男女女都擰頭擰頸、high上腦咁款，但歌詞就係極為粗鄙、不堪入耳嘅粗口，大鬧警察。囍雨估計現場大概都有成百人，而且唔少人都係中學生甚至小學生咁嘅年紀，有人仲揹住書包、著住校服，甚至仲有人喺現場展示港英旗幟。囍雨想問，呢班人究竟想點呢？咁又係叫表達訴求？其實囍雨見到當時仲有好多市民、大人喺現場圍觀，但片中所見就冇一個人企出嚟批評、制止過。

老師、家長點解唔制止？

囍雨喺度諗，係咪啲大人都覺得呢班學生冇錯冇問題嘅呢？大家睇下，反修例風波以嚟，啲後生仔暴力冇人出聲、犯法冇人出聲，依家公然爆嗮粗口仲好似好威、好開心咁，又係冇人制止，點解香港依家會變成咁嘅呢？啲示威者、大人成日批評政府呢樣果樣、話要為下一代爭取民主、自由，乜原來所謂「民主、自由」，就係搞到班後生仔除咗用暴力犯法之外、仲可以肆無忌憚咁喺大庭廣眾之下大唱粗口歌、鬧警察？囍雨真係請果啲口口聲聲話「要為下一代好」嘅人睇下，依家呢班「下一代」就因為一場反修例、反政府運動變成咁，大家又係咪想我哋未來嘅主人翁就係咁嘅樣？！

囍雨覺得，如果大家唔希望班後生仔女繼續錯落去，依家就要即刻企出嚟直斥其非，尤其係家長、老師，以至社會大眾都有責任同道德勇氣令佢哋睇清何為道理、何為歪理；如果喺佢哋依家咁嘅年紀就顛倒是非黑白，又或者以為做錯可以冇代價，咁等到佢哋將來真係成為「主人翁」，成個香港社會包括你同為就可能要「付出代價」。正所謂種下咩「因」、就會得到咩「果」，其實諗深一層，佢哋今日可以咁樣用粗口鬧警察，將來一樣可以咁樣鬧家長、老師，大家又係咪想咁？！

原圖：網片截圖