如果大家有留意近期嘅社會輿論，會發現一個由盲反政政客、媒體以至其友好機構製造出嚟嘅「假象」，就係無論示威者、激進示威者以至暴徒點錯、點樣暴力都好，呢啲政客、媒體、機構最後都可以將個「波」（責任）交返比政府，即使係暴徒直接向警員掟汽油彈，好似想「謀殺」咁款，對唔住，都係「政府的錯」；廣男今日睇新聞，見到由鍾庭耀廷帶令嘅「香港民意研究所」做咗個《反送中事件——民間民情報告》，內容除咗話青年「接受勇武程度增加」之外，仲話政府要「趁社會氣氛緩和盡快踏出第一步」，否則暴力行為會「螺旋式上升」。睇呢啲新聞，大家睇唔到啲咩？就係廣男睇嚟睇去，都睇唔到個報告話暴徒、政客以至部分媒體有錯囉！

抗爭手法接受程度更高？

廣男未有機會睇到呢個由鍾庭耀帶領嘅研究所撰寫嘅報告，不過觀乎傳媒報道，呢個用「意見交流會」同「慎思會議」收集意見、而且係專收隻年輕人意見嘅調查報告，內容大致都係年輕人大部分支持「運動」，對抗爭手法接受程度甚高等等。值得大家留意嘅係，鍾庭耀分析報告嘅時候，批評政府遲遲未推出對話平台，話政府應該盡快開始「對話」、呼籲「政府和特首即日劃線，讓市民知道警隊的表現回復以前的理性和規矩」、「而劃線前的事情則商討如何處理，否則螺旋式上升的暴力會到危險的情況」等等。睇完相關報道，廣男覺得鍾庭耀似乎未觸及一個問題，就係暴徒暴力不斷升級，政客、媒體等等有冇責任呢？

隻字不提政客的責任

坦白講，廣男唔係要同政府辯護啲咩，但由反修例「行動」開始，盲反派政客以至某啲媒體，不斷誤導市民，不斷煽動他人抗爭，甚至自己走上街頭幫啲暴徒「擋住」警察，既無譴責過暴徒暴力，更加無同暴徒割席；有啲完全顛倒是非嘅政客、媒體，甚至喺度美化暴徒行為，一時話佢哋「好和平」，一時又話啲暴徒「手無寸鐵」，令啲年輕人以為用暴力、違法手段爭取訴求好似「無問題」咁，點解鍾庭耀嘅報告或者分析一味講政府，唔譴責下暴徒同埋一直煽動抗爭嘅政客同媒體呢？

至於啲年輕受訪者或者「意見交流會」人士，話佢哋「更接受勇武抗爭手法」，呢個則係「有雞先」定有「有蛋先」嘅問題，係咪有政治訴求，就可以用暴力、犯法呢？盲反派政客、個別媒體以至鍾庭耀之流，好多言辭其實都係掩飾緊啲極端暴力嘅違法行為，俗啲講就係幫啲暴徒「漂白」、轉移視線；廣男可以話，暴力衝突升級到今日呢個場面，呢班別有用心嘅人士一樣有責任。最後一點，就係當啲年輕人、示威者、暴徒用上暴力手段，甚至連無辜平民、旅客、記者都打時候，唔該唔好喺度「合理化」暴徒暴行，咁樣做唔單止對事情無幫助，而只會助長仇恨、增加衝突！

原圖：rthk