所謂暴徒濫暴，唔止係講緊佢哋會對執法人員等動武，而係佢哋只要一言不合或者政見同佢哋唔同，就算係平民都可以照打，喺近月嘅反修例風波當中，無論係平民、搵食司機、老人家，佢哋都可以唔放過；噚日，一班反政府人士喺九龍灣淘大商場唱反政府甚至有「港獨」意味嘅歌曲，一個路見不平嘅男子喺現場唱國歌「抗衡」，結果梗係俾暴徒打啦，當場血流披面添！啲媒體、政客成日話班示威者、暴徒唔會傷及「無辜」，但佢哋依家連人哋唱國歌都打喎，廣男真係好想班反政府政客評論下事件！

對不起 路人都要打？

事緣噚日有示威者喺唔同地方嘅商場唱佢哋嘅「獨歌」，其中喺淘大商場，有一名手抱女童、另一隻手拖住其他小孩嘅男子不滿佢哋喺度騷擾到其他人，於是就唱國歌抗衡一班反政府人士，結果在場嘅黑衣暴徒就襲擊該名男子，該名男子血流披面，混亂期間仲一度同手抱嘅女童走失，幸好有人幫佢搵返女童，之後防暴警察到場，護送呢名「國歌男」同小孩離開。對於又發生暴徒襲擊平民事件，唔少網民都感到非常憤怒，甚至有人話班暴徒係恐怖份子！

講真，唔同人士之間嘅政見可能「差天共地」，但無論政見如何，定係你唱「獨歌」、我唱國歌，都唔代表暴徒可以打人！香港人連唱國歌都唔可以，就更加之荒謬！今日暴徒施暴之所以有恃無恐，完全係因為佢哋一次又一次施暴，而政客、個別媒體竟然不斷縱容包庇，甚至話班暴徒「好和平」、「手無寸鐵」！依家又發生平民被暴徒襲擊事件，廣男真係想問下班盲反派政客，佢哋肯唔肯譴責暴力，肯唔肯同暴力割席？否則，無論佢哋講啲咩係「政府唔啱」、「某人有挑釁」等等，統統都只係為暴徒開脫嘅藉口。

事情還未完結

噚晚，有唔少網民都起咗呢位「國歌男」嘅「底細」，有人話佢係某小學教師，叫各位「千祈唔好去投訴呢位教師」，大有要向佢發動「攻擊」嘅意味；如果呢位「國歌男」真係小學教師，而又面對反政府人士嘅「繼續」攻擊，廣男呼籲大家一定要發聲支持呢位教師，因為無論政見是否一樣，我哋都係捍衛呢位「國歌男」嘅表達意見自由，當中包括中國人、香港人唱歌嘅自由！ 

原圖：rthk