為應付不斷升級嘅暴力行為，警方決定向休班警員派發伸縮警棍，令休班警有需要亦可使用、執行任務；有政客以擔心「增加警民衝突」為由，質疑警方今次決定。囍雨就覺得，非常時期，就要用上非常手段，如果係太平盛世，囍雨唔會贊成休班警「配備」警棍，但依家社會亂象不斷，警察更成為暴徒襲擊嘅目標，如果警員只係喺執勤果段時間有Gear，喺休班時候萬一成為暴徒襲擊嘅目標，處境就會變得極度危險！

諸多質疑 從不提警員安全

依家警民關係「對立」，個別政客當然會質疑休班警「配備」警棍，例如民主黨立法會議員涂謹申，就話擔心警民關更對立，例如學生同休班警喺遊行集會期間口角，警員認為有需要用警棍制服學生，而周圍人士「以為」學生受襲，會變成打鬥云云。涂謹由呢個講法，係咪合理呢？

囍雨用另一角度去理解涂謹申呢個故事，如果休班警同學生、市民、示威者以至暴徒起衝突，警員需要用警棍制服對方，如果警員連警棍都無一支，會唔會好容易俾人圍毆，甚至打死呢？喺過去嘅一連串暴力衝突，例如沙田新城市廣場衝突以至荃灣嘅百人追打警員事件，有裝備喺身嘅警員都俾人瘋狂追打、圍毆，如果休班警有需要執行職務得自己「一對手」，同推自己俾人去「打」有咩分別？如果涂謹申都明白到依家啲人鍾意打鬥甚至追住警察嚟打，佢仲好意思叫休班警唔好攞支警棍傍身？

其實除咗休班警有可能要執行職務，休班警「配備」警棍，仲可以喺受襲嘅時候保護自己。眾所周知，警察係暴徒針對嘅目標，甚至已經成為被伏擊嘅目標，喺依家好多警察都已經俾人起咗底嘅情況之下，如果有人想伏擊警察，休班警係咪有支警棍喺手擋兩下，好過赤手空拳，任人魚肉呢？當個別人士質疑警方有關決定嘅時候，其實大家都要諗下，警察執勤時維持社會秩序，咁喺佢哋休班嘅時候，俾啲基本裝備佢哋傍身，其實都係合理！

止暴制亂 方為根本

對於休班警要「配備」警棍，其實都係百般無奈，如果唔想休班警有裝備，唔想有衝突，最簡單嘅方法就係反對暴力、止暴制亂，而唔係一味偏幫暴徒、攻訐警隊！ 

原圖:文匯報