廣男今日睇《生果報》報道，話資深大律師李柱銘同公民黨大律師吳靄儀近排攞咗個「法律界人權獎」，係由國際律師協會（IBA）頒發嘅「法律執業者人權領域傑出貢獻獎」，兩位仲好「謙虛」地聯合發表咗個「得獎感言」，話佢哋「只係代表所有喺艱難環境下，竭力維護法治嘅香港大律師接受獎項」（廣男就覺得佢哋其實讚緊自己多啲囉）。但當李、吳兩位講到自己好似好「維護法治」咁款嘅時候，廣男又想問下大家，咁耐以嚟有冇見過呢兩位「得獎者」譴責過暴力、又或者要求過嚴懲果啲違法暴徒呢？

事有湊巧，《生果報》今日除咗報道李柱銘、吳靄儀得獎之餘，仲登咗李柱銘一篇題為《法治不容大細超》嘅文章，但廣男睇嚟睇去就發覺佢呢篇「講法治」嘅文章，通篇除咗批評政府、譴責警方之外，又係完全冇提過一句暴徒暴力喎。例如李柱銘批評政府、警方就話「警察濫暴、奉旨犯法」、政府「對示威者窮追不捨，警察濫權就偏袒縱容」；但提到「示威者」，李柱銘就形容佢哋係「冒着生命危險走在抗爭前線的人士」、「付出了極沉重的代價」等等。咦！咁即係又只批評警方、唔譴責暴徒？！李柱銘所謂嘅「法治」會唔會太過「大細超」啊！

李柱銘「維護」緊咩法治？

所以當睇過李柱銘對「維護法治」嘅見解之後，大家真係要請教下佢，依家啲暴徒四處破壞、周街縱火；打爛港鐵設施、火燒地鐵出入口，又係咪破壞緊法治呢？點解李柱銘之流對呢啲違法行為又隻字不提呢？係咪仲要讚美、包庇？廣男就請大家留意，當一啲人對暴徒暴力視而不見，從來都唔譴責、唔割席嘅時候，呢班人所「維護」嘅又係咩法治？如果所謂「維護法治」就係好似李柱銘之流咁，一味譴責警方、政府，但又偏袒、縱容暴力，SORRY！廣男絕對唔同意！

看清香港亂象之禍根

尤其係大家唔好忘記，今時今日香港落得咁嘅混亂局面，真係多得李柱銘呢班盲反派政客唔少，因為自從爆發暴亂以嚟，呢班盲反派唔單止對只懂打爛香港嘅暴徒冇譴責過半句，更加堅持「與暴力同行」，仲不停喺幕後煽風點火，香港有今日亂象，呢班政客根本就係禍根。所以當聽到佢哋口中講出「法治」兩個字，廣男心中亦只有兩個字回應：無恥！

原圖：rthk