噚日囍雨就寫過，《生果報》老闆黎智英為年輕抗爭者嘅「殉道精神」所感動，仲稱呢啲係強大嘅力量；囍雨今日就想評論下，黎智英喺同一篇文章特意提到《緊急法》，仲基於「種種理由」話唔相信北京會容許港府動用《緊急法》。點解黎智英要提到《緊急法》而且煞有介事地表示相信事件唔會發生？當中原因，好有可能係因為如果港府動用《緊急法》，除咗暴徒嘅暴力抗爭行動無以為繼，經常煽動市民抗爭嘅《生果報》以至黎智英，必然深明《緊急法》就係殲滅佢哋嘅尚方寶劍！

緊急法關乎國家穩定？

同噚日篇文章一樣，為免誤會囍雨都係原文照錄黎智英講啲咩，等大家先自行思考一下：

「她的暴力升級會是推行《緊急法》嗎？不會。我不相信北京會容許她動用《緊急法》。《緊急法》執行背後必然是解放軍武力，實施《緊急法》與派遣解放軍入城並無分別。《緊急法》無法封閉金融和商業資訊流通，等於不能阻止巿民，利用社交媒體組織對抗力量。全面戒嚴實施後，若抗爭運動仍然繼續，中共再沒選擇唯有派遣解放軍鎮壓，後果是重蹈六四屠城的覆轍。是的，這災難我們會有人犧牲，但是中共卻有可能玩完，What a bargain！」

黎智英言下之意，大概就係如果港府動用《緊急法》，隨時令到國家都會受到其他國家嘅經濟制裁，「好大件事」；黎智英咁講合唔合理，大家可以自行思考，但囍雨所睇到嘅，係黎智英係咁叫「唔好」，好可能係反對派同黎智英極度恐懼《緊急法》。

緊急法下 特首可訂立任何規例

喺講點解囍雨認為黎智英「怕」《緊急法》前，囍雨首先要同大家講下《緊急法》係乜。所謂《緊急法》，正式名稱為《緊急情況規例條例》，根據《條例》，特首會同行政會議認為緊急情況或危害公安嘅情況時，可以訂立「任何他們認為合乎公眾利益的規例」，當中包括「對刊物、文字、地圖、圖則、照片、通訊及通訊方法的檢查、管制及壓制」等等。

根據《條例》嘅內容，如果特首、行政會議認為情況緊急而訂立「規例」，大家可以想像到，政府首先可以通過《禁蒙面法》等法例，令蒙面暴徒唔可以再蒙面作惡，咁暴徒嘅力量自然會大減；而對傳媒呢，政府可以對刊物等進行檢查同管制，咁《生果報》極可能係打擊目標之一，尤其甚者，如果特首會同行政會議訂立規例並追究煽動抗爭嘅媒體，黎智英會點，真係好難講。

所以呢，當黎智英特意講到《緊急法》，而且講到港府「唔會」動用嘅時候，囍雨反而睇到《緊急法》就好似一把直刺反政府人士、《生果報》甚至黎智英嘅「尚方寶劍」；正正盲反派越係話《緊急法》不可行，反而會令人聯想到，對付暴徒、反政府政客，《緊急法》其實係值得考慮！