綜觀近日嘅觀察，廣男發現本港嘅暴亂之所以發展到今日變得「一發不可收拾」，原來可以用兩個字去概括，就係「謊言」！點解咁講？因為每當時局稍稍平息，盲反派以至反政府一方，就會有人「製造」一啲不實指控，令反政府及仇警情緒再度升溫，令暴徒有「理由」繼續使用暴力。最新例子，就係不斷有人訛稱有示威者喺太子站「俾警察打死」；但如果呢個係事實，死者家屬唔會出嚟指摘警方？醫院方面唔會有消息傳出？盲反派仲唔開足三日記者會？唔好玩啦！呢種用謊言延續暴力抗爭嘅方式，除咗對被抹黑人士造成傷害、令社會更亂之外，根本無人會因此而得益！

太子站打死人？

有關於太子站「打死人」傳聞，其實政府、警方、消防處及醫院管理局已經澄清過，過去三個月嘅執法行動當中，根本就無致命個案；換句話說，所謂太子站有人「被打死」甚至太子站「死了6個人」等說法，全部都係假嘅！而由於真係有人相信太子站有人「被打死」，連日嚟去「獻花」，甚至不斷去太子站、旺角站等搞破壞；呢一種透過謊言去堆砌「理由」令示威者繼續「抗爭」嘅手法，實在係極之不道德。

謊言不斷 以假亂真

事實上，呢種極度誤導他人嘅手法，近幾個月可以話係屢見不鮮，喺政府提出《逃犯條例》修訂初期，盲反派就已經係咁將堵塞法律漏洞、處理台灣殺人案嘅修例抹黑成香港人「被送中」；隨住時間推演，盲反派、反政府一方嘅謊言，例如近日不斷有暴徒掟汽油彈，有啲人就屈警員扮暴徒掟汽油彈；明明係暴徒一方擲出汽油彈，有啲人直頭剪輯相關片段，營造係由警察掟汽油彈嘅假象；最近，甚至有人老作有女示威者喺被警察拘捕後俾警察輪姦，啲「故仔」沒有最過分，只有更過分。盲反派、反政府人士用呢啲手法誤導人，目的只有一個，就係挑動群眾情緒，令人繼續「抗爭」，甚至更加「勇武」抗爭！

面對盲反派、反政府人士嘅謊言，廣男就喺度諗，呢啲發放虛假消息嘅人士，如果佢哋可以毫無代價地散播假消息，然後煽動人去做破壞，其實佢哋有冇觸犯咩香港法律呢？如果有，警方係咪可以做番啲嘢呢？啲人成日話依家香港亂，甚至話警察執法令社會亂，但之所以亂，係因為有班人不斷煽動，甚至為咗煽動而「作故仔」，香港市民要睇清楚，一班居心叵測嘅人為咗破壞香港，可以去到幾盡。