以民主黨立法會議員林卓廷為首嘅盲反派政客同「長洲覆核王」郭卓堅，為咗抽政治水，近年不斷抽住擺明「無Case」嘅UGL事件嚟攻訐全國政協副主席梁振英；而向來「精甩尾」嘅林卓廷，明明自己籌咗一筆錢用嚟炒作UGL事件，但就「推」咗過氣政客曾健成出嚟就UGL事件提出司法覆核，有關覆核（連同郭卓堅提出嘅覆）今日有結果，就係高等法院裁定唔受理二人嘅覆核申請，原因係申請人無合理爭辯之處，亦無勝算，法官仲講明申請人嘅理據未能顯示律政司有違憲。廣男留意到，曾健成（人稱「阿牛」）前排去高院果時，好似都仲係「唔知頭唔知路」，喺度散播不實言論；而郭卓堅呢，仲喺度質疑梁振英係咪有「利益衝突」。喺呢度，就等廣男同大家重溫下事件，話俾佢哋聽點解呢單嘢完全無Case啦！

關沙中線咩事？

喺廣男講UGL事件前，首先要講講好似「乜都唔知」嘅「阿牛」，佢早前喺開庭前仲將UGL同沙中線拉上關係，可能因為UGL同有承接沙中線嘅禮頓公司同屬一間母公司啦；但係呢，梁振英喺2011年12月同UGL簽訂離職協議，有關協議喺2013年12月已結束，而持有禮頓公司嘅CIMIC喺2016年11月先收購UGL並成為主要股東；換句話說，喺梁振英同UGL協議到期時，梁振英同有承接沙中線嘅禮頓都無交集過，沙中線關梁振英咩事？「阿牛」連事實都不顧，或者連事實都唔清楚，就當眾玩老，係佢自己要咁做，定係有人喺背後教路，叫佢「屈得就屈」？

廉署、審貪會已澄梁振英清白

更加根本嘅問題，係曾健成之前表示希望由法庭裁定「不起訴梁振英的決定是否恰當」，呢樣嘢更反映佢真係「唔知咩事」；梁振英同UGL嘅離職協議，係各方包括當時戴德梁行嘅董事會都知情嘅離職協議，而且喺協議中扮演重要角色，就算係率先報道事件嘅澳洲傳媒，亦主動澄清咗協議為各方知情，並收回對梁振英嘅指控，可見協議根本就無產生利益衝突。而同樣重要嘅係，喺英國，就有不同執法機構包括金融行為監管局（FCA）、嚴重詐騙調查局（SFO）以及打擊犯罪調查局（NCA）都先後表明唔會有所行動、唔會調查UGL事件。

香港方面呢，就有廉署經過四年調查，「翻遍每一塊石頭」先決定Close File，呢個決定亦有極具權威性、成員包括各界專業人士嘅審查貪污舉報諮詢委員會作出審查。一個各方知悉、同意嘅離職協議，一個經英國、香港執法部門表示唔會再調查嘅事件，大家真係問下「阿牛」甚至郭卓堅，唔好講咩觀感或者政見，佢哋有咩證據證明到已經被廉署還清白嘅梁振英有罪嫌呢？如果得把口講，咁呢啲好明顯係「因人入罪」甚至係「有罪假定」！

林卓廷做「大台」

廣男仲留意到，之前林卓廷陪同曾健成出嚟嘅時候，仲向外聲稱睇到呢件事有「好充分嘅證據提出檢控」、質疑律政司司長云云；大家又要問下林卓廷，點解證據咁「充分」，但英國執法部門請你「食白果」呢？點解廉署會Close file呢？難道林卓廷喺廉署出身，連廉署都信唔過？仲有，如果證據咁充分，林卓廷做乜唔自己行出嚟提出司法覆核？係咪驚萬一官司輸咗要孭訟費，所以推個「過氣政客」出嚟頂？今日睇林卓廷等人嘅「天下為公」記者會，原來佢哋籌咗二百幾萬，轉眼間就俾佢哋用剩十幾萬，當中有大約60萬元係最近用嚟問兩個本地資深大律師攞法律意見，但記者問邊個佢哋「死都唔肯講」，仲話如果要有進一步行動例如提出私人刑事檢控，就要市民「重新支持」、眾籌法律開支；林卓廷等人嘅行動，原來就係不斷問市民攞錢，然後一路用啲錢做「政治騷」，林卓廷「計數」，真係永遠唔會死錯人！廣男亦非常好奇，係邊兩個資深大律司俾法律意見佢哋呢？問極都唔開名，係咪特登俾錢自己人賺呀？

原圖：rthk、文匯、視頻截圖