睇呢幾個月嘅新聞，有時真係唔可以唔佩服盲反派一班政客，明明發生咗一場又一場令人憤慨嘅暴力流血衝突，暴徒暴力不斷升級，但向來聲稱自己係「和理非」嘅佢哋，真係可以當自己「乜都睇唔到」，既唔同暴力割席，甚至只係不斷譴責警方、政府。噚日一班盲反派政客見記者，當然繼續佢哋一貫嘅作風，一味喺度攻訐政府啦，當中民主黨主席、立法會議員胡志偉甚至質疑政府係用「緩兵之計」；老實講，如果真係有人施以「緩兵之計」，咁一定係盲反派所為，因為佢哋一定會將件事最少拖到十一月尾，借勢為參選區議會嘅「自己人」做勢！總之為求選舉，不惜一切！

其實喺盲反派政客見記者之前，大家大概都會估到班政客講咩喇，例如政府撤例「撤得遲」、「未回應」其他四大訴求、警察武力等等，結果班政客真係咁講，其中盲反派會議召集人毛孟靜，就話政府無提到「警方過度用武」；而胡志偉呢，就批評政府撤例撤得遲，仲質疑政府用「緩兵之計」。睇到呢啲論調，大家首先要問下班盲反派政客，點解警察執法時要用到武力呢？

不割席 怕失去政治棋子與選票？

呢個問題，盲反派政客絕對唔會答大家，因為無論係暴徒衝擊、掟磚、掟鐵枝、破壞港鐵車站，阻礙機場運作、圍毆警察、放火、直接汽油彈掟向警方，以至毆打無辜市民、旅客以至記者等等，盲反派都唔會有一句批評或讉責，咁既係因為佢哋唔願意同暴力割席，更「深層次」嘅原因，係佢哋其實仲要「依靠」一班激進示威者甚至暴徒去反政府以至反中央，如果佢哋同暴力割席，令反政府力量開始分化，咁仲要邊個衝出嚟做佢哋嘅「政治棋子」同埋最實際嘅選票呢？所以喺「不割席」呢個口號背後，盲反派其實充滿政治考量，甚至可以話係用心歹毒。

至於胡志偉所質疑嘅「緩兵之計」，囍雨覺得胡志偉某程度上講得啱，因為真係有人施以「緩兵之計」，不過「施計者」其實係盲反派一班政客甚至係佢哋背後嘅金主。只要大家睇下呢幾個月條「時間軸」，由政府提出《逃犯條例》修訂開始，盲反派政客先妖魔化修例，之後示威者開始上街甚至動武，盲反派政客就一直包庇；到暴徒全面將暴力升級，佢哋一方面唔割席，一方面就有人「要求」建制派」票債票償，講到底，就係為咗選舉囉！

縱暴政客 要票債票償

發生咁多暴力流血衝突，的確需要某啲人票債票償，但對象係盲反派政客先啱；佢哋搭咁大個台，鼓吹暴力，推年輕人衝上前，置佢哋前途不顧，說到尾就係為選舉，大家如果要一班包庇暴徒嘅政客「找數」，無論係年底嘅區議會選舉，以至下年嘅立法會選舉，大家都應該識做啦！ 

原圖:RTHK