囍雨之前已經講過唔少關於流亡台灣嘅「抗爭者」故事，總括嚟講，佢哋依家嘅處境就係生活艱難、終日惶恐，前途難卜。早兩日囍雨又聽到電台節目訪問咗兩位身處台灣嘅年輕流亡者，印象最深刻嘅就係佢哋講到自己依家好似人球、棄嬰咁，每日嘅生活除咗擔驚受怕，就係得個「等」字，期望有獲得特赦嘅一日，甚至連屋企人都仲以為佢哋只係去咗台灣旅行。聽過呢番經歷，囍雨實在覺得心痛、惋惜。此時此刻，唔知佢哋又會唔會同自己講句：早知如此，何必當初？

被人踢嚟踢去 前程未卜

受訪者阿黃（化名）喺7月1號衝擊立法會之後因為好驚被拘捕，於是選擇逃往台灣「避難」。今年只得19歲嘅佢基本冇乜經濟能力，去到台灣之後嘅生活，係靠僅有嘅少少積蓄同十幾個「同路人」互相接濟、艱難度日。其中要面對嘅一大困難係礙於逗留有限期，佢哋呢班人只可以喺每逢簽證逾期前先出走到其他國家，然後再搞入台簽注。阿黃坦言，下下咁樣出境入境都「唔係辦法」，就好似人球咁被人踢嚟踢去，但長遠嚟講根本睇唔到人生方向；另一位唔肯「現聲」嘅受訪者阿力（化名）就透過阿黃表示，到咗台灣就好似同以前嘅人生一筆勾銷咁，像個棄嬰、國際人球；睇唔到後路、望唔到前程。

充滿後悔、矛盾、驚怕

囍雨相信，阿黃、阿力所面對嘅迷惘情緒同樣亦都瀰漫喺一班「同路人」中間，雖然佢哋仍然聲言「預咗」、「唔後悔」，但透過阿黃嘅語氣、聲調，大家都聽得出呢班人依家其實充滿後悔、矛盾同驚怕。當初佢哋逃離香港，就係因為擔心被捕、驚到唔敢番屋企；到咗台灣又驚洩漏行踪、畀人認到，所以連屋企人都唔敢多聯絡。囍雨都好想問佢哋，每當夜闌人靜、諗起香港嘅親人、朋友，真係「唔後悔」？如果係咁，何須搵一個「去旅行」嘅藉口瞞住屋企人？又點會預咗被拉但又唔敢返嚟香港呢？

其實了解過一個個逃亡者嘅故事之後，相信大家都同囍雨一樣心痛。就好似19歲嘅阿黃咁，如果當初冇犯法，仲係學生嘅佢依家應該享受緊新學年嘅校園生活、同家人共享天倫、仲可能有個大好前程……但就因為一念之差極可能改變咗成個人生軌跡，點會唔叫人扼腕嘆息！惟願呢啲前車之鑑可以警醒仍然執迷不悟嘅年輕人，明白喺香港法治社會，違法就會有代價、做錯就要承擔責任；亦希望阿黃等一班「同路人」體會過逃亡嘅滋味之後，可以重新行番條正道。

原圖：中通社