反對《逃犯條例》修訂風波發展到今日，明事理嘅香港市民，都知道就算有咩政治訴求都好，訴諸暴力都係唔啱嘅，同暴徒、暴力切割亦係喝止暴力所必要做嘅事；偏偏喺呢個動盪時刻，依然有政客、媒體嫌香港唔夠亂，係咁挑動矛盾。好似《生果報》咁，今日又有篇社評稱警隊「濫權濫暴」，將唔同事件列出嚟；對於呢啲單方面攻訐警方嘅言論，廣男剩係想問一句，《生果報》係咪見唔到掟磚、掟鐵枝、圍毆警察、掟汽油彈、當街縱火及破壞港鐵設施啲暴徒？一味抹黑警方而無視暴徒做過乜，《生果報》主筆係扮見唔到？定係刻意忽略暴徒暴行？

暴徒暴力  輕輕帶過

如果近月有睇開《生果報》，都會發現佢哋喺處理暴力衝突嘅新聞或者評論果時，有一套「乜都係警察錯」嘅「方程式」，例如有暴力流血衝突，有人襲警甚至放火，《生果報》一係就批評政府唔回應訴求，一係就批評警方使用「過分」武力；暴徒點暴力法？佢哋基本上唔會講，又或者只會「輕輕帶過」。《生果報》今日由盧峯寫嘅社評，亦都同之前嘅報道、評論用上同一套「方程式」，廣男見盧峯提到7.21元朗暴力事件、8.31警察喺太子站執法問題，但就覺得奇怪喇，乜近期嘅衝突，剩係得咁多？

盧峯作為主筆，廣男相信佢都有留意開新聞，佢咁鍾意講「暴力」事件，其實大家可以問下佢，暴徒向警察掟磚、掟鐵枝，佢有咩睇法？暴徒喺街度打一啲政見唔同嘅平民，佢有咩睇法？甚至暴徒近日全面將暴力升級，直接向警察掟汽油彈，在鬧市縱火，佢又有咩睇法呢？如果警察執法時使用到武力盧峯咁大反應，咁啲暴徒周圍放火打人，盧峯係咪要強烈譴責兼同暴力割席先？否則，無論《生果報》、盧峯等講到幾「正義」，都只係為咗反政府、反中央而不顧事實嘅歪理！

鐵路職員放工經過都要打？

噚日廣男睇新聞，港鐵有休班職員喺寶琳站受襲受傷，而寶琳站設施亦被暴徒破壞；廣男相當好奇，《生果報》眼見鐵路職員放工經過都無端端被暴徒「打一身」，係咪都要評論一下，「追究」一下暴徒暴力呢？答應當然係唔會啦！因為但凡係佢哋「自己人」，打咗人、打傷人、燒親人，都係「正義」的；其他人包括警察，如果使用到武力，就一定係「唔啱」。《生果報》邏輯，就係「民主精神，放火打人」！