特首林鄭月娥透過電視講話，提出撤回《逃犯條例》修訂等四大回應，囍雨必須指出，呢幾個月令到修例事宜「一發不可收拾」，甚至令到暴力場面不停爆發嘅「兇手」，其實係一班一直炒作事件、扭曲事實、包庇暴力嘅盲反派政客！如果唔係佢哋不斷縱容暴力，甚至歌頌「暴徒」，香港今日唔會咁亂，亦唔會有咁多年輕人被捕，繼而可能斷送前程！

一切從扭曲修例開始

幾個月前，當政府提出要修訂《逃犯條例》開始，明明係處理台灣殺人案、堵塞法律漏洞，盲反派政客就將修例講成為「香港法庭唔能夠把關」、「內地會蔑造罪證」等等，想將事件變成反對高鐵「一地兩檢」嘅翻版（但事實證明，「一地兩檢」完全無問題）；之後激起部分市民上街遊行，更逐漸惡化至有示威者化身暴徒，用磚頭、鐵枝等物件襲警，盲反派政客對種種違法暴行又視而不見，甚至有人妄稱「看不見有人掟磚」。

本來香港人素來和平、理性，只要社會大部分人士願意挺身而出反對暴力，暴徒就會自行「收埋」；但別有用心嘅盲反派政客，偏偏就係唔願意同暴力割席，有啲政客稱呢啲都係因為「制度暴力」，有啲就剩係講警察執法，有啲直頭不斷「歌頌」暴徒，經常製造美化暴徒嘅故事！

盲反派一定要票債票償

發展到今日，暴徒已經唔係掟磚、掟鐵枝喇，而係直接將極可能致命嘅汽油彈掟向警員，甚至鬧市縱火，但盲反派政客有冇譴責暴力？答案係一句無嘅，佢哋由始至終，都只係掛住攻訐警方、政府，汽油彈佢哋扮見唔到，丫叉彈珠佢哋當見唔到，當街縱火亦視而不見，甚至其他平民受襲、網上欺凌等等，佢哋一樣當見唔到。暴徒瘋狂堵路、破壞港鐵設施、阻礙機場運作、影響旅客出入等等違法行為，更無半點譴責。和理非？對唔住，香港已經無「和理非」嘅盲反派政客，只係得番「縱暴派」甚至「暴力派」嘅盲反派政客！

所以各位心清眼亮嘅市民，一定要認清今日嘅種種亂象，都要多得呢班盲反派政客；而佢哋做咁多嘢，一為所謂嘅「雙真普選」、改變香港同中國未來，即係爭奪治權，一為年尾甚至下年嘅選舉，即係為選票，乜都做得出。既然如此，大家就要記住，如果要懲罰呢班為咗選票而無所不用其極嘅人，一定要用返選票懲罰佢哋。喺年尾區議會選舉、明年的立法會選舉，如果有人係縱容暴徒、唔同暴力割席嘅，大家謹記要佢哋票債票償！

原圖：毛孟靜facebook