咦！涉嫌煽惑、參與非法集結、處於保釋期嘅香港眾志秘書長黃之鋒，今日又飛咗去台灣喎！同行嘅仲有盲反派立法會議員朱凱迪及學聯前副秘書長岑敖暉。據報佢哋此行會拜會民進黨同激進「台獨」政黨「時代力量」；黃之鋒自己就聲稱，今次係去座談、交流，同埋「爭取更多台灣人為香港加油」。囍雨又真係好好奇，一個揸住大聲公多次煽動示威者非法集結、包圍警總嘅「港獨」分子，同一班「台獨」勢力又會「交流」啲咩呢？

獨派人士紛紛接見

據了解，黃之鋒今次快閃赴台兩日嘅行程「相當豐富」，同佢會面嘅人士包括激進獨派勢力「時代力量」嘅黨主席徐永明、立法委員黃國昌，立法院黨團主任陳惠敏，民進黨主席卓榮泰等；又會同新官上任民進黨副秘書長嘅「太陽花學運」領袖林飛帆舉行記者會，仲會分別喺台北、台中出席兩場對談會，大談香港局勢。睇到咁嘅接待陣勢，囍雨都要驚訝地講句，啲「台獨」勢力似乎真係好「畀面」黃之鋒喎，唔知係咪因為佢搞亂香港嘅「經驗」好值得借鑒呢？囍雨又真係好想知，當黃之鋒「介紹」香港局勢時，又會唔會講下啲示威者點樣縱火、破壞、襲警呢？

「港獨」「台獨」交流經驗？

老實講，對於黃之鋒之流所謂嘅「交流、介紹」，囍雨就一定打個大問號。大家必須要諗下，佢所講嘅「香港局勢」究竟有幾多係客觀、持平嘅事實呢？佢所講嘅又有冇代表性呢？尤其係囍雨印象所及，黃之鋒見親啲台灣政客絕大多數都係獨派甚至深獨人士，其中同佢最「friend」果位，就係依家身居民進黨要職嘅林飛帆，大家唔好忘記，佢哋一個係屢次煽動違法嘅「港獨」分子，一個就係率眾霸佔台灣立法院嘅「台獨」學運領袖，大家覺得佢哋又會交流啲咩「經驗」呢？

執筆之時，囍雨見到有內地官媒今日嘅社論就以「新生代漢奸」形容黃之鋒之流，囍雨想講，對佢有咁嘅「定性」絕對事出有因，一言蔽之就係拉攏外部勢力、唯恐香港不亂。就好似佢今次去台灣，口口聲聲話「爭取台灣人支持」，但大家諗下，係咪應該話「爭取台獨支持」先至更準確啲呢？佢哋有咩真實目的，大家心明啦！

原圖：社交網站圖片