成日聽到一句說話，就係真小人唔可怕，偽君子先係最得人驚，因為前者都可能係「明刀明槍」要搞事，後者呢，扮到一本正經咁，其實就心懷不軌；今次廣男講緊邊個？咪就係教育界立法會議員葉建源囉！事關佢近期接受電台訪問講到罷課嘅時候，好似既無明確表明支持罷課，又無話要反對罷課，而係話如果學生考慮後要罷課，校方要尊重。咁即係點？即係既唔想得罪反罷課人士，又怕激嬲支持罷課人士？原來作為教育界議員，竟然「無立場」，玩「騎牆」！

葉建源的「空廢」言論

廣男記得之前睇書，曾經睇過一個學術用語，叫做「空廢」，簡單而言就係「講咗等於無講」，說話、言論無內容可言；廣男覺得用「空廢」二字形容葉建源嘅說話，就最為貼切不過。作為一個教育界議員，對於罷課問題一係支持，一係反對，咩叫做「若果學生經成熟思考後參與反修例罷課，以表達政治立場，校方應該予以尊重，建議學校以學生請假的方式處理」，即係既不反對，又不支持？

立法會有教育界代表，就係要喺有需要嘅時候，教育界代表就住喺大、中、小學等發生嘅事發聲，對於學生因為政治理由而罷課，葉建源係咪反對？又或者，如果葉建源覺得政府施政有問題，所以支持罷課，都係一種表態。依家佢語意曖昧、含糊其詞，原來一個年薪以百萬計嘅教育界議員，有事嘅時候就係講一啲「兩邊都想唔得失」嘅說話，咁立法會、教育界仲需要呢個議員咩？

政客在看 視若無睹

喺呢度，就等廣男講下自己嘅立場，第一罷課最直接影響到嘅，就係學生自己嘅切身利益，因為返學、學習係學生嘅本分，罷課既影響學習進度，甚至有可能影響前程；第二，可以話係更重要嘅，就係一班學生如果罷課，就增加出去抗爭嘅可能性，如果有學生、初中生甚至小學生出嚟抗爭，繼而受傷、被捕，咁呢個責任邊個去承擔？係鼓吹罷課者嘅責任，定係一班政客諸如葉建源「視若無睹」所以要負起責任？

其實只要用常理諗下，都知道學生罷課、上街抗爭嘅風險極大，偏偏葉建源作為教育界議員、代表，就喺度「耍太極」，顧左右而言他；如果葉建源係要反政府，夠膽就話自己係「支持罷課，寧不顧學生學習的福祉」，而唔好喺度玩閃避球！ 

原圖：RTHK