但凡係反政府行動，煽動者、參與者，公開發言以及接受訪問，說話一定要「慷慨激昂」，否則就好難吸引支持者繼續參與反政府行動；但有時某啲說話，出自某啲人把口，就會變成「笑話」。好似《生果報》老闆黎智英咁，日前接受美國媒體訪問，話香港反修例行動係為咗同美國共同相信嘅價值，喺「敵人陣地」同中國戰鬥，更話係「為美國而戰」，仲話自己準備好「戰死」（It's a battle Lai says he's prepared to die for）；有網友睇到相關新聞，就毫不客氣地講：「承佢貴言！一路好走」，唉，見到啲網友巴不得黎智英「早點歸去」，真係智慧在民間。

網友齊呼：好行唔送

所謂「識得睇，一定睇留言」，黎智英呢單新聞故然「有趣」，但啲網友留言就更「有趣」，有網友睇到黎智英話準備「戰死」，有網友話「好行唔送」，有網友就話要「買定香檳慶祝」，甚至有網友話要放「煙花」；有心水清嘅網友，就話「漏咗幾粒字」，因為黎英明明係話「已準備好派班冇腦嘅去戰死」，個網友仲話自己已經「Fact Check」。綜觀唔同網友嘅回應，大致可用一句說話去概括，就係佢哋似乎睇穿咗黎智英，恨不得黎智英 …

主導政變推其他人「戰死」？

囍雨向來愛惜生命，亦唔鍾意咒人「早點歸去」，但囍雨覺得黎智英呢番說話，係有啲古怪嘅；例如佢話自己準備「戰死」，大家認為有冇可能呢？好多時遊行，大家都會見到黎智英喺隊頭有份拉特大橫額，但係衝突都未發生，基本上已經唔見咗黎智英嘅踪影，真係唔明佢可以點戰死喎？所以網民話佢其實係推其他人去「戰死」，成件事就合理得多喇！

至於黎智英意指自己為美國而戰，呢啲都唔係咩新鮮事喇，佢之前「訪美」已經講過類似嘅說話，寫文亦講過差唔多嘅論述，甚至寫文都講過要「改變香港、中國未來」；黎智英嘅種種言行，正正顯示出一個事實，根本由佢或者《生果報》所「主導」嘅媒體輿情，已經唔係咩反修例，而係活脫脫主導一場政變，想要「普選」，甚至想打垮中國。而難得嘅係，似乎社會仲有好多年輕人前仆後繼，「間接」幫助黎智英同「中國戰鬥」；有時囍雨就喺度諗，黎智英預備好「戰死」，《生果報》又咁鍾意鼓勵啲年輕人出嚟做「衝衝子」，唔知大家有冇機會見到黎智英一家大小，戴齊Full Gear裝備，齊齊出嚟抗爭，然後搵啲手下訪問返自己，做個「衝衝家庭」嘅專訪呢？ 

原圖：大公報