呢排個個都講緊反修例，其他社會議題、案件都好似俾啲人忽略晒咁，廣男今日睇新聞，見到一單關於保釣行動成員郭紹傑仲喺日本被扣押嘅新聞，佢涉嫌喺舊年12月喺東京靖國神社抗議、燒「神主牌」而被捕，到依家仲被拘留，單案亦未審完；據報日本控方要求法庭重判郭紹傑入獄一年、另一被告嚴敏華入獄十個月。單案最後點判，大家都未知，不過廣男反而想知道，郭紹傑係咪好掛住自由得多嘅香港呢？

在香港做「無問題」？

點解廣男會覺得郭紹傑掛住香港呢？事關三、四個月前，被扣押嘅郭紹傑接受訪問，稱自己當時只係和平示威，無暴力行為，唔明白點解會被捕，認為係政治檢控，仲話「喺香港做同樣嘅事，並無問題」；據報，郭紹傑被捕時仲俾日本警方整傷，事隔幾個月都未好返，佢承認自己當時行為魯莽，對唔住家人云云。簡而言之，就係「早知今日，何必當初」呢？

睇到郭紹傑未結案就俾人扣留咗八、九個月，廣男嘅直接感覺，就係香港真係好自由！平時香港啲示威者，遊行、集會嘅時候「燒嘢」抗議，有時好似「例牌菜」咁，只要唔係燒到國家、特區象徵例如國旗、國徽，一般而言都無乜事；依家郭紹傑去日本燒人「神主牌」，未結案就先「坐」九個月，可見相比起其他地方嘅法律，香港對班示威者都算係咁啦！

無人要「Free Kwok」嗎？

另一個問題，就係依家班反政府人士、政客不斷高叫「Free Hong Kong」，老實講，其實郭紹傑係佢哋「自己人」，喺違法佔領期間係金鐘嘅「糾察長」、「糾察」，又曾經挺身保護盲反派「金主」黎智英，點解啲香港政客、郭紹傑啲「同路人」唔多啲行出嚟叫「Free Kwok Siu Kit」嘅？係咪郭紹傑已經無利用價值？所以除咗間唔中「聲援」下佢、探下佢之外，就當佢係「用完即棄」嘅棄卒？

所謂人在人情在，郭紹傑只係喺外地抗議犯事，啲盲反派政客就好似「忘記」咗佢咁，包圍日本領事館？衝擊日本領事館？唔會啦！香港政客、示威者有個特性，就係對住特區以至中央政府就裝作兇狠，對住外國勢力？恐怕只會搖尾乞憐，所以郭紹傑今次抗議，好明顯係搵錯「對象」，自找苦頭啦！