網上面噚日出現咗一個名為「803行動」、有懸紅嘅報料網站，引嚟全城熱議，因為佢列明會就30宗涉及反修例嘅暴力案件作出懸賞外，有案件嘅懸紅金額仲高達100萬港元，搞到好多人話想「篤灰」，亦有反對暴力嘅人士打算「捐錢」支持懸紅；而凡事與暴徒「站在同一陣線」嘅《生果報》，梗係會想盡辦法抺黑「803行動」啦，今日佢哋就有篇「政情」報道，稱「懸紅搵笨」、「原來靠眾籌」云云。囍雨實在懷疑，係《生果報》理解錯誤，以為人哋無錢？定係佢哋懼怕好多人「舉報」，會搞到佢哋啲暴徒「逐一落網」呢？

抹黑「行動」無錢？

睇返《生果報》報道，除咗以〈梁振英百萬懸紅搵笨 原來靠眾籌〉為題外，內文又提到「正當大家都諗緊邊個咁疏爽之際，原來網站入面話之後會眾籌「緝兇」，即係啲懸紅未有人認頭」。言下之意，似乎係想講「行動」係無錢，或者要靠眾籌先有錢俾懸賞，但囍雨睇返相關宣傳，人哋好似唔係咁講㗎喎，《生果報》又玩抹黑？

心虛怕暴徒 被「舉報」

根據「803懸紅報料網」入面嘅資料，講明「懸紅的賞金全部來自民間，日後還會眾籌」，囍雨用常理去理解，意思應該係啲賞金全部係來自民間，日後亦都會眾籌，即係有錢來自民間，第時亦會繼續籌錢；囍雨實在唔明白，《生果報》係咪連咁簡單嘅語句都理解唔到？囍雨估計，唔係《生果報》理解有誤，而係佢哋都怕暴徒被「舉報」，所以對外訛稱「803行動」無錢，企圖淡化呢個「行動」嘅力量，講白啲即係心虛。

囍雨今日睇媒體報道，就有知情人士表示過，所有懸紅金額都已經籌足，只要係「實料」，最終令警方成功逮捕同檢控涉事者，令相關疑犯喺各級法院答辯，懸紅金額就會隨即發放，即係「檢控，就俾錢！」老實講，啲暴徒可以話係《生果報》以至其老闆黎智英「改變香港、中國未來」嘅重要棋子，《生果報》怕佢哋俾人舉報，都好正常；不過，囍雨認為《生果報》咁樣抹黑懸紅行動，可能有更多痛恨暴徒嘅人更加想捐錢俾「803行動」囉！ 

原圖：RTHK