騙徒手法層出不窮，《生果報》「鼓勵」暴徒繼續抗爭嘅手法，當然亦都係日日新鮮啦；今日廣男睇《生果報》，發現《生果報》原來已經有之前嘅支持抗爭、美化暴徒，「進化」成為講述示威者「死也不怕」，就算警方出動實彈，都要「走到前線」、「奉陪到底」云云。廣男好奇，《生果報》講到啲抗爭者唔怕死，或者有抗爭者真係「唔怕死」，但若果真係因為抗爭而死，咁佢哋家人點？係咪自己反政府願意送上性命，就打算留低家人承受傷痛呢？

抗爭不能回頭？

睇到《生果報》呢篇題為〈手足身心重創 抗爭漸無底線 衝衝子：警槍 監獄 也不怕〉嘅文章，訪問咗所謂「衝衝子」嘅陳先生，呢位陳先生話自己心裡面「無底」，亦唔能夠回頭，就算警方出實彈，佢亦會走到前線，仲寫好遺書，有事啲保險金會用嚟支援其他抗爭者；如果坐監，就當繼續「增值」自己，仲聲稱「港政府如果要令市民粉身碎骨，就算螳臂擋車，我都會奉陪到底」。睇到呢度，大家有冇一種心寒嘅感覺呢？

要家人傷心？無辜市民「陪葬」？

對於呢位陳先生，或者其他所謂嘅「衝衝子」係咪唔怕死、唔怕坐監，廣男唔係佢哋肚入面條蟲，實在唔知真假；但廣男就喺度諗，就算當呢位陳先生唔怕死，萬一佢真係因為抗爭或者做暴徒而「死在街頭」，佢家人會點？會傷心到咩程度？又或者佢因為施暴、同警方對抗而受重傷，咁佢之後日子就點？係咪一句「唔怕死」，就等於做乜都得？

另一系列問題，就係當啲所謂「衝衝子」、示威者甚或暴徒唔怕死、唔怕子彈，咁佢哋出嚟抗爭，甚至用上極度暴力手段，咁警方都會受傷，例如喺近日嘅暴力衝突中，就已經有暴徒直接向警方掟汽油彈喇，係咪啲抗爭者唔怕死，就可以搵埋啲警察以至其他無辜市民「陪葬」呢？有人打算勇武抗爭，但其他人唔想被牽連、受傷，如果一句不滿政府就可以做乜都得或者做「敢死隊」，咁香港以後用暴力就可以解決問題啦！

睇完呢篇報道，以至《生果報》嘅其他報道同評論，廣男剩係想問一句，《生果報》係咪嫌依家流血事件仲唔夠？收手啦，唔好再將年輕人變為反政府嘅籌碼！ 

原圖：文匯報