暴徒使用暴力，近期好似已經變成「常態」，有時仲令人感覺「見慣不怪」咁款，廣男呢幾日睇新聞，見到一單令人幾「無奈」嘅新聞，就係一班猶如「驚弓之鳥」嘅暴徒，似乎已經連幾支「智慧燈柱」都驚，暴徒攞齊工具，包括手掀電鋸將位於觀塘區一帶嘅智慧燈柱鋸斷拉倒及大肆毁壞。佢哋嘅理由，大概就係啲燈柱會監控佢哋，甚至將佢哋嘅資料傳送返內地；不過，呢啲統統都唔係事實，因為啲燈柱只係用嚟監測天氣、交通狀況等等。原來勇武嘅暴徒，會怕咗幾支燈柱，廣男覺得當中原因好簡單，就係佢哋恐懼，害怕佢哋嘅違法惡行會被紀錄落嚟，日後要負刑責，所以佢哋一直將施暴地點嘅「鏡頭」，一一視為「大敵」！

燈柱資料無聯接內地

根據傳媒報道，呢啲喺觀塘同啟德發展區安裝嘅燈柱，主要目的喺用嚟收集氣象、空氣質素同交通快拍三類實時城市數據；至於盲反派政客以至個別暴徒所講嘅會將「資料傳送到內地」等功能，有關人士亦已經澄清，雖然燈柱有設備係由內地嘅電子公司提供，但根本就無將系統連結到內地。換句話說，呢啲暴徒對「燈柱嘅指控」，完全係子虛烏有。

如果細心留意下近期嘅暴徒嘅一系列動作，大家唔難會發現，佢哋每去一個地方進行破壞，所有「有鏡頭」嘅設備，幾乎肯定係佢哋必要破壞嘅設備，例如警署嘅鏡頭、港鐵站嘅鏡頭，甚至連一般商舖作保安之用嘅鏡頭，佢哋都唔會放過；歸根究柢，就係佢哋怕自己所做嘅壞事會被紀錄落嚟，最後成為被拘捕甚至被定罪嘅證據。

店舖亦受破壞

喺剛過去嘅週末，廣男認為仲有一點值得大家留意，就係一班暴徒嘅目標，肯定已經唔係政府或警察（之前都有襲擊平民嘅不良紀錄）。例如喺荃灣，就有路過司機因不滿道路被堵塞，同暴徒理論果時被襲擊；另一方面就有麻雀館、食店等店舖因為被「懷疑」，所以被嚴重毁壞。呢啲算唔算係「無差別襲擊」？係咪但凡被暴徒所「懷疑」嘅，無論係人定係一支燈柱，都唔會被放過？其實班暴徒如果驚犯罪證據被紀錄落嚟，最好就係唔好犯法！如果唔想俾人話佢哋襲擊平民或者商舖，最好嘅方法，就係唔好使用暴力，令其他香港市民怕咗佢哋。 

原圖：文匯報