噚日係元朗7.21襲擊事件發生一個月，一批示威者響應網上號召去到元朗西鐵站大堂搞所謂「靜坐集會」，聲稱要抗議、追究警方當日處理手法等。但結果係點呢？可能大家都已經通過傳媒報道，對之後發生咩事有所了解，簡單嚟講就係一班人係元朗站大堂大鬧一餐、盡情破壞之後一走了之。而更神奇嘅係，無論集會組織者以至盲反派政客，對噚晚嘅違法破壞完全唔提唔譴責，好似冇事發生過咁款。廣男真係要講句，咁都叫「靜坐集會」？如果畀班人食過番尋味、下下用呢招周圍搞事，香港仲有安寧日子？

不停挑釁 大鬧西鐵站

廣男今日睇報道，其實集會開始果陣的確係尚算和平有序，但去到九點半左右，情況就開始有變化。一批大約廿幾人、全副「武攻」裝備嘅黑衣人衝出西鐵站，除咗拖水馬拆站牌設路障之外，又用鐳射光挑釁警方同村民；將近十點，警方舉旗警告，同一時間防暴警察同速龍小隊開始推進，一班黑衣人就退守西鐵站G出口附近，繼續挑釁警員，但警方一直保持克制、只係喺天橋戒備。

當呢班黑衣人見警方無進一步行動，呢個時候就開始喺大堂大肆破壞，除咗到處噴漆寫侮辱字句、用雨傘、頭盔敲打牆壁天花製造聲勢之外，又拆毀站內嘅環保回收箱、鐵馬等設施製造路障，另外有人就用站內滅火筒不斷噴射、拖消防喉周圍灑水、倒防火沙及灑不明液體到地上等等，甚至有人高空擲物、將垃圾桶拋向路面。呢班激進分子前前後後大鬧咗個幾鐘頭，搞到成個西鐵站裡裡外外煙霧瀰漫、一片狼藉。睇過呢班人嘅所作所為，大家仲會唔會佢哋只係「示威」、「表達訴求」咁簡單呢？廣男就覺得佢哋擺明想製造衝突、撩交打多啲囉。

想搞事者 總有理由

首先大家要諗下，如果只係和平集會、靜坐，有無需要full gear戰鬥格咁款呢？其次，呢班人係站外生事，搞破壞、照鐳射光，明顯就係想刺激村民、挑釁警方；再者，當警方克制，呢班人就得尺進尺、大搞破壞。咁發展落去，如果警方執法拉啲破壞人士，肯定又係一場「襲警戰」，再次流血收場。廣男猜測，可能呢個正正係一班激進分子嘅真正目的。

所以廣男要勸大家，唔好再任由一班激進分子一再生事，最好嘅方法就係堅定企出嚟反暴力，見到暴力要譴責、要割席。當市民大眾開始渴求回復秩序、回復法治時，總有小部分人想挑起事端、製造衝突，如果佢哋下下以「和平」之名到處搞事，又或者趁靜坐、集會故意搞破壞，咁香港社會一定亂象難治，冇辦法恢復安寧。大家又係咪想見到咁呢？

原圖：文匯報