囍雨之前同大家講述過唔少警察嘅艱辛，例如前線警員身負重裝、長時間執勤之餘，內心仲要忍受被人惡意抹黑、甚至家人被欺凌、滋擾嘅煎熬。今日囍雨又聽到一個關於警察子女喺校園被欺凌、侮辱嘅真人真事，同樣令人心酸。囍雨相信，無論外表幾「硬淨」嘅鐵漢，佢哋嘅內心深處都有一個「最柔軟」嘅地方，時刻記掛住佢哋珍愛嘅妻兒、家人；喺香港依家咁嘅環境之下，警察作為執法者已經承受緊好大嘅身心壓力，但有啲人就唔單止要針對警察，仲要連佢哋嘅仔女、家人都唔放過，囍雨真係覺得好心痛。

旁人難以體會嘅心痛

今次故事嘅主人公，係香港警隊嘅英籍總警司、警察機動部隊校長莊定賢。佢向媒體坦露心聲時講到，「學校嘅體育教練對我個十三歲女兒講：「『你爸爸做緊一件令人噁心嘅事情，你應該為你爸爸係一個警察而感到傷心』」。囍雨聽完，真係唔敢去想像，當一個十三歲嘅女仔聽到老師咁樣話自己嘅爸爸時，心裡係咩感受，亦都無法體會當莊定賢知道女兒嘅經歷後，係懷住點樣嘅心情揹起裝備、繼續走上執法前線。囍雨只想問，大家如果將心比己，心裡面又係咩滋味？莊定賢就直言，「如果針對我個人或者工作，可以接受；但如果針對我嘅妻子、孩子，不能接受」。

囍雨明白，修例風波發展至今，成個香港社會已經嚴重撕裂，但係咪有人因為對政府不滿、對施政不滿，或者對警方處理手法不滿，就要咁樣針對每一個警員、將佢哋當成敵人、甚至遷怒於佢哋家人、仔女呢？大家要明白，警察作為執法者，有人犯法，就要執法。誠如莊定賢受訪時所講，面對示威者嘅極端暴力，警隊已經係以無法想像嘅克制，容忍咗破壞、堵路；依家警隊面臨緊前所未有嘅挑戰，「我哋想做嘅就是一如既往執行任務，努力完成使命」。囍雨相信，呢番話亦都代表咗絕大多數執法者嘅心聲，所以當佢哋為守護香港而緊守崗位時，大家實在應該多啲體諒同理解，至少唔好再施加傷害。

仲要殃及幾多無辜者？

執筆之時，囍雨又見到仲有人喺網上煽動嚟緊開學日針對警察仔女嘅欺凌行動；近日亦有政黨表示接到好多家長及警嫂投訴，包括仔女被人影大頭相、唔少警員嘅家庭成員資料被人擺上網等等。囍雨要奉勸一句，收手啦！一個文明嘅社會，唔應該係咁！尤其係當有人諗住以「禍必及家人」嘅手段去打擊警隊時，大家都要諗下，咁樣做除咗只會令更多無辜嘅人受到傷害之外，對香港有咩好處？對解決時下社會矛盾又有咩幫助？

原圖：網絡