打從六、七月開始，廣男覺得整場反對《逃犯條例》修訂行動，根本已經變咗質，開頭就反修例，之後就要求撤回修例，一路發展落去，就衍生出要求特首林鄭月娥下台、再變成實行「雙普選」等訴求，盲反派既劍指政制，甚至有劍指中央嘅意味。今日廣男睇新聞，見到盲反派元老、資深大律師李柱銘撰文稱無普選先係「深層次問題」，廣男就喺度諗，搞咁多嘢，其實反修例只係幌子，達到更大政治目的，先係盲反派心中所想。

李柱銘「例牌」講政制

如果有留意到李柱銘以往嘅文章，都會大概知道李柱銘嘅套路，就係無論佢寫緊咩題目，佢好多時都可以將問題拉埋政制嚟講；佢今日寫文講反修例爭議，當然都拉埋政制嚟講啦；由此亦可見，所謂反修例，根本只係一個「理由」、「藉口」，盲反派最想做嘅，其實係撼動政制。

大家留意下近期盲反派政客近期嘅言行，就更加會印證到廣男嘅講法。例如《生果報》老闆黎智英就講明，想改變香港甚至中國嘅未來；「香港眾志」黃之鋒，直頭講到明要爭取「自決」權利，計及其他政客或者激進政客嘅說法，有啲直頭講到明要爭取嘅係「港獨」。所以如果大家仲認為盲反派係反緊修例，或者只係爭取緊「有機會」達到嘅訴求，咁就實在太天真喇！

事實上，盲反派嘅訴求係一個問題，佢哋嘅行動不斷升級又係另一個問題，初頭遊行，之後衝擊、掟磚；再發展到最近，瘋狂圍毆警察、平民，甚至掟汽油彈傷人都有。如果盲反派政客、激進示威者或者暴徒繼續抗爭，一個最有可能出現嘅情況，就係佢哋爭取唔到啲咩（自決、改變中國未來邊可能），但就將一個又一個年輕人推上戰場，甚至送入監牢。廣男覺得，李柱銘等政客如果真心想香港好，最應該做嘅唔係繼續喺度「叫價」，而係幫手叫啲示威者、暴徒收手。

年輕人機靈 識得「就地取材」？

值得留意嘅係，李柱銘同其他無同暴力割席嘅政客一樣，似乎都喺度默許緊暴力行為，例如喺佢今日篇文，就講到「當下抗爭的年輕人為了香港竭盡所能。他們的思路敏捷，沒有武器，便就地取材」，廣男唔知道佢所講嘅「就地取材」，係咪講緊掘磚頭、拆圍欄呢？廣男又想問下，「就地取材」又包唔包括彈珠同汽油彈呢？老實講，李柱銘自己都有兒子，應該明白子女安危、前途好重要，何必要係咁「暗讚」、「鼓勵」嘅年輕示威者呢？你個仔唔會去衝，其他人嘅子女，難道就應該去衝？