面對暴徒無日無之、不斷升級嘅暴力行為，盲反派以至《生果報》選擇不譴責、不割席，仲要不斷將矛頭指向執法嘅警察；今日，囍雨睇《生果報》，又發現類似嘅謬誤，《生果報》評論員李怡以〈止暴制亂釋義〉為題撰文，一方面稱示威者「行為從來沒有使市民產生絲毫恐懼」，一方面又稱示威者「在多數情形下，示威者對警察的暴力，只是自衞性的反抗」，講到示威者好「和平」咁，但呢個係咪事實呢？示威者或者暴徒，真係咁「斯文」？

暴徒打平民 瘋狂毆警察

對於李怡稱「至於示威者，即使是勇武派，他們的行為從來沒有使市民產生絲毫恐懼」，囍雨真係忍唔住要講句，李怡選擇性失明！隨舉數例，喺之前嘅所謂九龍區大遊行，平民包括老人家、女商人都喺街頭被暴徒襲擊；之後到7.21遊行，更加有路過客貨車司機被暴徒圍毆。講番近少少，日前喺機場發生嘅一系列暴力事件，內地旅客同記者被禁錮、侮辱、恐嚇同圍毆，李怡仲夠膽講示威者或者暴徒無令市民恐懼？定係李怡覺得雖然有平民俾示威者、暴徒圍毆，但受害者無「產生絲毫恐懼」呢？

至於李怡話示威者、暴徒喺多數情況下對警察使用暴力只係「自衞性的反抗」，呢個講法就一樣咁荒謬，因為暴徒不時施暴，而且手段嚇人！喺6.12暴力衝突，暴徒衝擊、襲警，過程中磚頭「橫飛」，呢啲係「自衞性的反抗」？之後喺沙田新城市廣場嘅暴力事件，幾十個暴徒瘋狂圍毆一名警員，又係「自衞性的反抗」？又或者當晚有警員被咬斷手指，都係暴徒嘅「自衞性的反抗」？近日有警員被暴徒所掟嘅汽油彈所燒傷，大家都要問下李怡，呢啲係咪又係「自衞性的反抗」先？美化暴徒暴力，美化到呢個程度，李怡為咗反政府、中央，真係乜都講得出口！

反政府 不代表可以胡亂抹黑

老實講，班暴徒有冇打過平民、令到平民有所恐懼，或者係咪只係「自衛性」襲警，絕大部分市民以至媒體都心中有數；李怡嘅反中反共立場，其他人都好清楚，但如果因為政治立場連暴力行為都當睇唔到，甚至掉返轉話係被毆者「有錯」，咁就實在太過扭曲是非！或者被毆者唔係李怡本人，所以佢可以寫文大講「風涼話」，但對於被毆嘅受害者而言，李怡呢啲言論，根本就係「二次傷害」！ 

原圖:文匯報