盲反派議員、政客訪美，永遠都有一條「方程式」，就係先表示要反映香港狀況，希望美國政要關注香港事務；然後去到美國呢？當然就係剩係講一啲有利於於盲反派、不利於政府嘅說話，甚至不惜顛倒是非，隱瞞事實，為嘅就係想美國介入、干預香港事務。最新嘅例子，就係公民黨立法會議員郭榮鏗、楊岳橋訪美，曾聲稱要提供「提供正確的事實基礎」嘅郭榮鏗，竟然同楊岳橋喺「亞洲協會座談」不斷展示示威者受傷相片；廣男剩係想問一句，佢哋有冇展示示威者掟磚、放火、襲警、打旅客、打內地記者嘅相？如果無，係咪玩以偏概全、一味老屈？！

只展示示威者受傷相片？

今日廣男睇郭榮鏗、楊岳橋Facebook，見佢哋喺「亞洲協會座談」展示咗一啲相片，佢哋稱包括「警察濫暴的情況，包括示威者受傷和永久失明的照片，警方在地鐵站內發射催淚彈，以及黑社會在元朗襲擊途人等」相片；睇到呢啲相，大家真係要問下兩位議員，點解無暴徒掟磚嘅相？點解無暴徒掟鐵枝嘅相？點解無暴徒放火嘅相？點解無暴徒掟汽油彈嘅相？點解無暴徒襲警嘅相？點解無暴徒圍毆旅客嘅相？點解又無暴徒禁錮辱打內地記者嘅相？

對暴徒暴力 視而不見

廣男未問完，以上嘅暴力行為，主要針對警察、記者或者內地旅客，香港平民、商舖都未計！之前喺九龍區大遊行，啲暴徒打老人家、女商人；7月21遊行，示威者連路過客貨車司機都毆打，仲要打爛人哋部搵食車；到8月5日，喺荃灣有暴徒又打老人家；喺機場，暴徒又連搭飛機返香港嘅香港人都打；其他暴力事件，包括襲擊的士司機、遊行期間刑事毁壞人哋商舖（上水）等等，呢啲暴力行為，郭榮鏗、楊岳橋係睇唔到？定扮睇唔到？廣男嘅感覺，就係呢兩位政客、「法律界人士」，似乎為咗政治利益，要將所有嘢屈晒落政府、警察度，而且甚有誤導美國政要、公民嘅嫌疑！

郭榮鏗、楊岳橋嘅美國之旅相信仲未結束，大家可以預計到，佢哋一定會繼續抹黑政府、警察；面對呢啲極度偏頗、顛倒是非嘅政客，大家要問佢哋，係咪到呢一刻，佢哋仲未肯同暴力割席，要全面企喺暴力派一邊？如果係嘅，對唔住，佢哋根本上就係暴力派、暴徒嘅一分子，而且係中堅分子！ 

原圖:RTHK