如果大家對盲反派「籌款」有印象嘅話，大約都會記得違法「佔中」到依家，曾承諾會交代帳目嘅盲反派人物，好似到今日都未公開返「佔中」盤數；又或者由民主黨林卓廷等人發起嘅「天下為公」籌款，錢就籌咗，但近幾個月已經「無晒聲氣」。睇到盲反派呢啲「往績」，囍雨就喺度諗，由榮休主教陳日君樞機、吳靄儀等人發起嘅「612人道支援基金」（「基金」），到依家籌咗近5,000萬元，不過要面對數以百計嘅反修例被捕人士，就算用盡5,000萬元，人均可以得到嘅資助10萬都唔夠，係咪真係幫到啲所謂「義士」呢？如果根本幫唔到、幫唔足，而班「義士」又相信有支持者「撐」佢哋，所以所有抗爭行動「做到盡」，咁後果會係點呢？

五千萬捐款 但被捕人士達700人

根據「基金」截至8月8日嘅工作簡報，「基金」籌咗近5,000萬元，已經批出約86萬元，涉及個案人次為52人次；至於跟進嘅個案，就有411人次；回覆查詢方面，人次就大約有850人次。見到呢啲數字，囍雨有幾個問題，認為值得大家思考：

一） 根據傳媒報道，近月被捕人士約有700人，而「基金」跟進嘅個案人次（只係計人次而唔係計人數）大約係400人次；到底係「基金」唔係個個都幫，定係唔係個個被捕人士都有搵「基金」幫手？如果係前者，佢哋選擇幫唔幫一個被捕人士時有冇咩準則呢？

二） 根據「基金」的文件，提供幾多資助、係咪資助，由「基金」信託人作最終決定，至於「基金」信託人內部決定資助嘅程序，其實係點嘅呢？

三） 喺「基金」嘅法律支援申請表格中，有一句備註寫上「基金信託人對是否資助任何法律費用及資助金額，保留最終決定權」，但之前「基金」又有聲明指「所有因參與反送中運動而被控的朋友，基金會支援其法律開支」；如果係「全部被控人士」都支援或者資助，點解仲要保留所謂「最終決定權」？呢啲係保障自己嘅條款，定係喺特別情況例如要先幫「自己人」，所以要行使「最後決定權」？

四） 根據市民理解，「基金」有一班義務律師支持，呢啲義務律師會唔會先義務幫被捕人士，到佢哋真係俾人告的話，就變接咗單「生意」？如果係，佢哋會收市價、法援價定友情價呢？

五） 撇除義務律師問題，啲被捕人士要搵律師嘅時候，「基金」會唔會安排「友好」律師支援，變相變成呢邊向公眾籌完錢，轉頭啲錢又去咗啲「友好」度？定係除非當事人有要求，「基金」幫手搵律師果時會避嫌，首先唔會搵同盲反派有關，或者本身係盲反派政客嘅律師、大律師呢？

六） 就如上述資料所指，未計將來，已經有700人被捕，而「基金」約有5,000萬元，假設呢啲人都被起訴，呢啲款項除返人頭（先撇除法援），每人平均資助連十萬元都無，如案件喺高院審理嘅話，可能連幾堂律師費都唔夠俾，「基金」點樣如佢聲明所指「所有因參與反送中運動而被控的朋友，基金會支援其法律開支，直至整個案件完結為止」呢？

七） 根據「基金」資料，「基金」亦有建議（或鼓勵）被捕人士申請法援，但好似法援署署網站所指出，申請法援既有經濟審查，又有案情審查，例如要確立申請人係咪有合理嘅申索或抗辯理由；如果啲被告申請唔到法援，而「基金」又已經無足夠資源幫佢，咁啲被告點算？借錢打官司？（被告反政府又想用政府資源、公帑為自己打官司，則係另一個問題 … ）

不要鼓勵違法 應與暴力割席

以上種種情況，都令囍雨有滿腦疑問，到底呢個「基金」係咪真係幫到啲所謂「義士」？如果到最後法援同「基金」都幫唔到啲被告，啲聽信政客煽動嘅所謂「義士」，又點面對審訊？諗到呢啲問題，囍雨就覺得成件事未必係班盲反派政客諗得咁完美；其實呢，與其不斷諗點樣支援示威者甚至暴徒，不如班政客勸啲人唔好犯法，同暴力割席仲好啦，始終都係「預防勝於治療」嘛！ 

原圖:中通社