一連數日喺機場進行嘅所謂「和你飛」示威集會，演變成「阻你飛」行動，嚴重癱瘓機場運作、影響無數旅客之餘，更再一次發展成為暴力衝突，有無辜內地旅客、記者被禁錮、虐打，有警察被襲擊。囍雨今日睇新聞話，有連登仔噚日發起「道歉大會」，向連日受阻嘅旅客公開道歉。囍雨想講，呢班人絕對應該向所有旅客、市民以及受害者道歉，但如果佢哋係真心悔過，淨係道歉並唔夠，而係要自首！因為佢哋唔單止係犯咗錯，更加係犯咗法。

不止犯錯 更是犯法

根據媒體嘅報道，所謂「道歉大會」就係有一班人喺機場手持「SORRY FOR INCONVENIENCE  HK is SICK」（「對唔住阻到你 但香港病了」）嘅標語，向旅客90度鞠躬，又送糖果「表達歉意」；而一班署名「一眾渴望自由民主的香港人」亦發表公開信，聲稱機場係「唯一可安全抗爭之地」，所以懇請被迫滯留或更改旅程嘅旅客，看在年輕人係為咗「社會爭取自由民主人權的份上，體諒其苦衷」。囍雨想問下班示威者甚至暴徒，你哋嘅所作所為只係為旅客帶嚟「不便」咩？禁錮、虐打、凌辱、襲警都叫「爭取民主人權」？

最高可處終身監禁 暴徒識驚

事實上經過機場「最黑暗一夜」之後，囍雨見到唔少法律界人士都企出嚟指摘暴徒，更明確指出佢哋已經涉嫌干犯好多嚴重罪行，例如「危害機場的安全的非法行為」、「非法禁錮」、「襲擊致造成身體傷害罪」等等，有啲罪名一旦成立，最高刑罰可處終身監禁。囍雨唔知呢班人嘅所謂道歉，係咪因為自己都知「真係搞大咗」、「隨時坐成世監」，所以依家先嚟識驚，但既然「驚」，點解仲要去犯法呢？大家睇過呢班人嘅違法行為之後，又係咪接受佢哋講句「Sorry」就一筆勾銷呢？

坦白講，囍雨其實好懷疑呢班人依家出嚟「道歉」嘅誠意，之前佢哋癱瘓政總、阻塞稅務大樓，一樣道歉過，但結果呢？之後照樣到處霸佔堵塞，範圍仲越嚟越大、暴力程度越嚟越激烈。所以佢哋今次又玩呢招，囍雨就質疑佢哋根本只係為咗扮弱者、博同情，為之後再搞事「儲民意」。所以囍雨想講，如果呢班人真係知錯、悔過，就唔單止要道歉，更加要去自首，咁先至係負責任嘅做法。囍雨都係果句：如果驚，最簡單就係唔好犯法；犯咗法，就要承擔法律責任！

原圖：Facebook