噚日喺機場發生嘅暴力事件，可以話係令人側目，有內地旅客、記者被禁錮、毆打，有暴徒甚至連執法當中嘅警察都圍毆，完全係無法無天；發生咗嚴重暴力事件，正常嘅香港人、香港媒體，都應該對暴徒暴行予以最強烈嘅譴責，但唔知點解，《生果報》好似完全「見唔到」有人打旅客、打警察咁，單方面聲稱示威者被打到「頭破血流」。偏頗到呢個地步，到底《生果報》有無傳媒道德，抑或已經化身為暴徒最大嘅「消毒機器」！

睇下《生果報》講啲乜

任何有留意到噚晚新聞嘅人，都應該睇到內地旅客、記者及警察被毆打，前者仲要俾人禁錮、「虐待」咗幾粒鐘，但《生果報》點講呢，囍雨原文節錄俾大家睇下：

「集會人士檢查其手機，發現這名內地男被攔截時，被『踢出』一個WeChat群組，在場人士認為他有可疑，一度用索帶綁住其雙手不准離開，他亦被人淋水。」

「內地男其後報稱不適暈倒，救護員到場將他送上擔架床並戴上氧氣罩，但在場人士阻止該名男子離開。」

同理，好多人都從新聞或者網上片段睇到警察執法俾暴徒圍毆，《生果報》又點講呢？大家可以睇睇：

「此時有另一群防暴警員仍在客運大樓近正門出入口位置，與示威者爆發衝突，並施放胡椒噴霧，一名警員更一度拔出佩槍指向市民。擾攘15分鐘後，晚上約11時半速龍小隊增援，示威者與防暴警在機場客運大樓門外發生衝突，有示威者被打到頭破血流，多名示威者被帶走。」

完全對暴力視而不見

囍雨就覺得，《生果報》真心「好波」，記者、編輯、編採中層以至管理層好似完全「唔覺」暴徒禁錮、恐嚇甚至打人，將件事輕描淡寫講到有人被懷疑係警員、內地公安，所以「被人淋水」；至於被圍毆嘅警察呢？對唔住，《生果報》好似剩係「睇到」警察舉槍（佢嘅影片則話暴徒係「救人」），囍雨真心懷疑，「到底我睇咗啲咩呀？」《生果報》要幫暴徒「消毒」，呢啲係人所共知嘅事，但接二連三發生暴力事件，佢哋唔係當「完全睇唔到」呀？

仲有一點，明明呢兩日機場俾暴徒搞到立立亂，數百航班要取消，唔少旅客都對此非常不滿；但編採技巧「極高」嘅《生果報》，竟然仲可以用〈遊客無懼白色恐怖 繪出最美機場〉為題報道，指有外國滯留旅客無埋怨暴徒，仲稱「很多國家的人民都不敢為爭取自己應有的自由和權利而發聲，但他們卻如此勇敢」。打旅客、記者及警察，《生果報》當無發生過；旅客受阻、不滿，《生果報》就整隻諸如「旅客不埋怨 讚示威者勇敢」嘅故仔，論顛倒是非，真係俗世中不知邊個俾《生果報》「高」！