反修例風波越演越烈，大家喺網路以至媒體所見嘅片段，唔少都係批評政府以至警隊；反政府人士日前又開始發起去機場「接機」嘅行動，囍雨留意到其中一條片段，就係一個被示威者圍堵甚至毆打嘅男士，接受訪問表明自己都唔滿意政府，但咁唔代表班示威者可以施暴。對於社會而言，呢種唔滿意政府、但亦唔滿意示威者行動嘅聲音，可能代表到社會部分人士嘅心聲；有資深新聞工作者，甚至分析社會將會出現黑衣、白衣以外嘅另一種「顏色」，就係穿上「灰色衣服」的「溫和」聲音（moderate voices），囍雨認為，呢種代表和平理性嘅「灰色」聲音，其實就係現時仍然較為少出聲嘅沉默大多數。

兩極化並非好事

本港資深新聞工作者Nury Vittachi，日前喺佢嘅社交平台發表咗一篇題為〈MOVE OVER, BLACK SHIRTS. The grey shirts are coming〉嘅貼文，除咗引用數據指網上輿論趨向「溫和」（moderate），指出香港正出現一班既避開示威者，又唔係支持中央嘅人，佢哋從懷疑警方，開始對黑衣人士（即示威者一方）有懷疑；而一啲對社會、經濟造成影響嘅行為，亦會令本身支持黑衣人士考慮轉向「灰色」。呢啲「灰色衣服」人士比黑衣人士更溫和，既支持民主，亦願意遵守法律、支持警方以及反對暴力，同所謂「藍絲帶」以及沉默大多數契合；Nury Vittachi預計，呢啲「灰色衣服」人士，將會發揮橋樑作用。

凡事物極必反

囍雨就覺得，凡事都係「物極必反」，當初反修例人士打出民主、自由甚至要爭取「免於恐怖嘅自由」旗幟，確實係得到部分市民嘅支持；但隨住佢哋嘅行動不斷升級，甚至係違法「罪行」不斷升級，仲係咪咁多市民支持佢哋呢？老實講囍雨甚有保留，例如早排有人搞所謂「三罷」行動，原來唔止係自己罷工、罷課，有個別示威者仲要阻礙鐵路、道路運作，搞到有返工嘅市民喺港鐵站對住啲示威者不斷大叫「暴徒！暴徒！」；又例如上述所講、喺機場被毆打嘅男士，都講明佢唔滿意政府，但佢亦要批評呢啲阻住其他人嘅行動。凡此種種例子，訊息相當清晰，就係「你哋示威但搞到香港立立亂，支持你嘅人都可能變成反對你！」

到底香港會唔會出現一輪「灰色衣服」行動，囍雨估計唔到，但沉默大多數會陸續發聲，囍雨相信呢個會係一個趨勢；值得留意嘅係，無論係Nury Vittachi所指酒店、零售業界所反映嘅經濟狀況，抑或係政府所講嘅經濟下行風險，其實都未「浮晒上面」，當經濟不景氣候更嚴重地影響到香港市民生計，囍雨覺得到時社會反彈會更大；如果大家唔想香港「衰到貼地」先出聲，其實依家就應該發聲，對暴力說不，對影響大家生活嘅破壞者說不！ 

原圖：RTHK